“Арассыыйа-Куба” матчевай көрсүһүүгэ Егоров уонна Ложников кимнээҕи кытта киирсиэхтэрэ билиннэ
Балаҕан ыйын 13, 14 күннэригэр Волгоград куоракка буолар Арассыыйа уонна Куба боксаҕа сүүмэрдэммит хамаандаларын икки ардыларыгар матчевай көрсүһүүгэ кимнээх кытталлара билиннэ.
Бу күрэскэ Куба бастакы нүөмэрдэринэн кыттар. Ол курдук, Көҥүл арыытын чиэһин Дамиан Арсе Дуарте (49 киилэҕэ диэри ыйааһыҥҥа), Хорхе Гриньнан Меренисьо (52 кг), Осбель Давид Кабаллеро (56 кг), Ласаро Альварес Эстрада (60 кг), Энди Крус Гомес (64 кг), Рониэль Иглесиас Сотолонго (69 кг), Осли Иглесиас Эстрада (75 кг), Хулио Ла Крус (81 кг), Эрисланди Савон (91 кг) итиэннэ Хосе Лардуэт Гомес (91 кг үөһэ) көмүскүөхтэрэ.
Арассыыйа сүүмэрдэммит хамаандатын сүрүн тириэньэрэ Эдуард Кравцов кубинецтартан ордук ааттаах-суоллаах Ласаро Альвареса Эстрадаттан, Энди Круса Гоместан, Хулио Ла Крустан, Эрисланди Савонтан уонна Рониэля Иглесиаса Сотолонготтан сэрэхэдийэрин биллэрдэ. Бу туһунан “Новости” РИА иһитиннэрдэ. Санатан этэр буоллахха, Ла Крус – 2016 сыллааҕы Олимпиада чөмпүйүөнүнэн, аан дойду түөрт төгүллээх чөмпүйүөнүнэн; Сотолонго – 2012 сыллааҕы Олимпиада кыайыылааҕынан, 2008 сыллааҕы Олимпиада боруонса призерунан, аан дойду 2009 сыллааҕы чөмпүйүөнүнэн; Альварес Эстрада – 2012 сыллааҕы Олимпиада боруонса призерунан, аан дойду үс төгүллээх чөмпүйүөнүнэн; Савон – 2016 сыллааҕы Олимпиада боруонса призерунан, аан дойду 2017 сыллааҕы чөмпүйүөнүнэн буолаллар.
«Чэпчэки ыйааһыннарга киирсиэхтээх боксердар билиҥҥитэ киэҥ эйгэҕэ биллэ иликтэр, ол эрээри Куба сүүмэрдэммит хамаандатын чилиэннэрин сыаналаабат буолуохпутун сатаммат”, — диэн эттэ Эдуард Кравцов.
“Арассыыйа-Куба” матчевай көрсүһүүгэ дойду сүүмэрдэммит хамаандатыттан саха боксаҕа оскуолатын иитиллээччилэрэ — Горнай улууһуттан төрүттээх Артур Ложников 52 киилэҕэ диэри ыйааһыҥҥа уонна Мэҥэ Хаҥаластан Василий Егоров 49 киилэлээхтэргэ кытталлара күүтүллэр.
Кинилэри сэргэ Арассыыйа хамаандатыттан Батор Сагалуев (49 кг), Карен Арутюнян (52 кг), Бахтовар Назиров, Шахриер Ахмедов (иккиэн — 56 кг), Альберт Батыргазиев, Артур Субханкулов (иккиэн — 60 кг), Павел Федоров, Иван Козловскай (иккиэн — 64 кг), Андрей Замковой, Харитон Агрба (иккиэн — 69 кг), Глеб Бакши, Максим Коптяков (иккиэн — 75 кг), Георгий Кушиташвили, Павел Силягин (иккиэн — 81 кг), Магомедмурад Арсланбеков, Иван Сагайдак (иккиэн — 91 кг), Максим Бабанин, Владимир Иванов (иккиэн — 91 кг үөһэ) киирсиэхтэрэ.
Роман ПОПОВ, edersaas.ru
Хаартыска Интэриниэттэн ылылынна.