1993 сыл ахсынньы 12 күнүгэр референдум ыытыллан, Арассыыйа саҥа Конституцията олоххо киирбитэ. Бүгүн Конституция төрүттэммитэ 25 сылын бэлиэтиир дьоро тэрээһин Өрөспүүбүлүкэ саалатыгар буолан ааста.
Дьоро тэрээһиҥҥэ Ил Дархан уонна бырабыыталыстыба дьаһалтатын салайааччы Федор Борисов Ил Дархан Айсен Николаев аатыттан эҕэрдэ тылы этэн туран, үлэлэригэр уһулуччу көрдөрүүлээх дьоҥҥо наҕараадалары туттарда. Ол курдук, Дьокуускай куорат “Остров сокровищ” оҕо саадын музыкальнай салайааччыта Наталья Васильева Ил Дархан грамотатынан бэлиэтэннэ. “Роспотребнадзор” Хаҥалас улууһунааҕы отделениетын начальнигын солбуйааччы Федора Варфаломеева, Дьокуускайдааҕы клиническэй балыыһа фельдшер-лаборана Анна Габидуллина, Мэҥэ Хаҥалас улууһун Хара нэһилиэгин баһылыга Дария Назарова, Хотугулуу-Илиҥҥи федеральнай университет юридическэй факультетын кафедратын сэбиэдиссэйэ Анатолий Слепцов “Гражданскай килбиэн” бэлиэни туттулар. “Норуоттар доҕордоһууларын уонна эйэлэрин бөҕөргөтүүгэ үлэтин иһин” Саха Өрөспүүбүлүкэтин бочуоттаах бэлиэтинэн аҕа көлүөнэлэр сэбиэттэрин бэрэссэдээтэлэ Августа Марфусалова наҕараадаланна.
Конституционнай суут бэрэссэдээтэлэ Александр Ким-Кимэн дойду сүрүн докумуона эрэгийиэннэр статустарын, федерализм суолтатын үрдэппитин бэлиэтээн туран, манна Саха Өрөспүүбүлүкэтин Бастакы бэрэсидьиэнэ Михаил Николаев ылар оруола улаханын эттэ.
Өрөспүүбүлүкэ Сууттарын бэрэссэдээтэлэ, Үрдүкү Суут бэрэссэдээтэлин солбуйааччы Любовь Летучих бу докумуон ханнык да Конституциялардааҕар (ССРС да, РСФСР да) атыннык оҥоһуллубутун, манна киһи бырааба, көҥүлэ бастакы күөҥҥэ тутуллубутун бэлиэтиир.
Ил Түмэн бэрэссэдээтэлин солбуйааччы Антонина Григорьева Конституция төрүттэммитэ 25 сыллаах үбүлүөйүнэн эҕэрдэлээн туран, ахсынньы 21 күнүгэр парламеҥҥа ыытыллар научнай-практическай кэмпириэнсийэҕэ ыҥырда.
Бу бэлиэ күҥҥэ 14 саастарын туолбут оскуола оҕолоро Саха Өрөспүүбүлүкэтин кылаабынай федеральнай инспекторыттан Виктор Хохрин илиититтэн пааспар туттулар. Ол Дьокуускай куорат оскуолаларын үөрэнээччилэрэ Анна Букина, Ксения Гантимирова, Евгений Друзьянов, Руслан Кузьмин, Анастасия Татаринова, Дмитрий Федоров.
Аграфена КУЗЬМИНА, “Саха сирэ” хаһыат, edersaas.ru