Бэс ыйын 12 күнүгэр биһиги дойдубут улахан суолталаах судаарыстыбаннай бырааһынньыгы – Арассыыйа күнүн бэлиэтиир. 2002 сылга диэри бу бырааһынньык Арассыыйа судаарыстыбаннай суверенитетын туһунан декларация ылыллыбыт күнүн быһыытынан биллэрэ. 1990 сыл бэс ыйын 12 күнүгэр Арассыыйа Федерациятын норуодунай депутаттарын сийиэһигэр Суверенитет декларациятын ылыммыттара.
Бу күн киин куорат болуоссаттарыгар ырыа-тойук дьиэрэйдэ, араас аахсыйалар, тэрээһиннэр, быыстапкалар буоллулар. “Арассыыйа – мин историям” мультимедийнэй историческай паарка Аһаҕас аан күнүн тэрийдэ.
Манна сарсыарда 10 чаастан “Берегиня” оҕо дьиэтин иитиллээччилэрэ уонна “Ночные снайперы” мотокулууп чилиэннэрэ бэлэсипиэтинэн сүүрдүүнү тэрийэн, историческай пааркаттан аттаннылар.
Сарсыардаттан мусуой аанын тэлэччи аста. Бары экспозицияларга киирии босхо. Документальнай киинэлэри эмиэ босхо көрдөрдүлэр. Ону ааһан, Ленин болуоссатыттан уонна пааркаттан босхо оптуобустар чаас аайы сырыттылар. Патриотическай санааны өрө көтөҕөр кэнсиэр, уруһуй күрэһэ, Нуучча географическай уопсастыбатын киинэлэрин көрдөрүү, тус-туспа тиэмэлээх квест-оонньуулар, лотерея, сэбиэскэй кэм оонньуулара, лиэксийэлэр, быыстапкалар тэрилиннилэр.
Ангелина Васильева, «Саха сирэ» хаһыат, edersaas.ru