Арассыыйа күнүгэр Дьокуускай куорат бары уокуруктарыгар, элбэх кыбартыыралаах дьиэлэр олохтоохторугар култуура, искусство тэрилтэлэрин үлэһиттэрэ кэнсиэртэрин бэлэхтээтилэр.
edersaas.ru
Ол курдук, Арассыыйа гимнин, төрөөбүт дойдуга таптал туһунан ырыалары өрө көтөҕүллүүлээхтик толорон, Бүтүн Арассыыйатааҕы аахсыйаҕа кыттыстылар. Ону тэҥэ, изоляция эрэсиимигэр олорор дьоҥҥо “Арассыыйа түннүктэрэ”, “Арассыыйа былаахтара” аахсыйалар эмиэ ыытылыннылар.
Бу күн 203 микрооройуон түөлбэтигэр хас да сиринэн ырыа-тойук дьиэрэйдэ, эҕэрдэ тыл этилиннэ, дьиэлэр түннүктэрэ, болкуоннара былаахтарынан, саарыктарынан киэркэйдилэр.
Суорун Омоллоон аатынан Опера уонна балет тыйаатыра кэнсиэртиирин истэн, олохтоохтор эрдэттэн бэлэмнэммиттэрэ көстөр, болкуоннартан былаахтарынан далбаатыы көрүстүлэр.
Анал массыына тиийэн кэлэн, кылгас кэм иһигэр аппаратуураны туруордулар, дьоҕус сцена курдук оҥорон, киэргэттилэр. Кинилэргэ волонтер кыргыттар көмөлөһөллөр. Тыас-уус мааны этэ диэн бэлиэтээн этиэххэ наада. Ол иһин үөһэ этээстэргэ да олорор дьоҥҥо үчүгэйдик иһилиннэ.
Тэрийээччилэр – ыччат дьыалаларыгар, социальнай коммуникацияларга министиэристибэ, Губинскай уокурук управата, 203-с түөлбэ старосталарын сэбиэтэ.
Опера уонна балет тыйаатырын солистара: СӨ үтүөлээх артыыһа Александр Емельянов уонна Ольга Чемпосова үрдүк таһымнаах кэнсиэри бэлэхтээн, дьиэҕэ хаайтаран олорооччулар сүргэлэрин көтөхтүлэр. Александр сөҥ куолаһынан Саха сирин туһунан ырыалары ыллаан доллоһутта, оттон Ольга үрүйэ уутунуу кылыгырас, ыраас куолаһа намыын, иэйиилээх ырыалары ыллаан, үгүс сүрэҕи долгутта.
Түмүккэ Арассыыйа өрөгөйдөөх гимнин иккиэн ыллаатылар. Түннүктэрэ атын хайысханан тахсар буолан, сорохтор тэйиччи соҕустан көрөн туран, тэҥҥэ ылластылар, ытыстарын тыаһын харыстаабатылар. Үс ый устата дьиэҕэ олорбут, тыыннаах кэнсиэри көрбөтөх дьон олус үөрдүлэр, махтаннылар.
Артыыстар бэйэлэрэ да өр кэмҥэ ыллаабакка, көрөөччүлэрдиин алтыспакка, тууйуллубут буолуохтаахтар. Онон икки өттүттэн үөрүүлээх түгэн буолла.
Түөлбэ 6-с, 7-с куорпустарыгар Өксөкүлээх Өлөксөй аатынан Норуоттар доҕордоһууларын дьиэтэ кэнсиэртээтэ. Бу дьиэлэр, арааһа, Дьокуускай үрдүнэн саамай элбэх былаахтаахтар быһыылаах. Кыайыы күнүгэр түннүктэрин уотунан «75 лет» диэн суруйан, үгүстэри сөхтөрбүт дьиэ олохтоохторо эмиэ кинилэр. Онон өссө төгүл түмсүүлээхтэрин, көхтөөхтөрүн көрдөрдүлэр.
Аата да этэрин курдук, култуура киинэ кэнсиэригэр араас омуктар ырыаларынан-тойуктарынан, үҥкүүлэринэн эҕэрдэлээтэ, былаахтары күөрэччи туппут уолаттар, кыргыттар хаамыталаатылар.
Арассыыйа – бу биһиги дойдубут, хас биирдиибит дьылҕата, олоҕо ыкса ситимнээх алаһа дьиэбит. Биһиги күүспүт – түмсүүбүтүгэр!
Ангелина Васильева, “Саха сирэ” хаһыат, edersaas.ru
Ааптар түһэриилэрэ.