Сэтинньи 11 күнүттэн 22 күнүгэр диэри «Арассыыйа инникитин туһугар — аныгы көрүүлэр» диэн лозунунан эрэгийиэннэр икки ардыларынааҕы улахан форум ыытыллаары турар.
edersaas.ru, СӨ Ыччат дьыалаларыгар уонна социальнай коммуникацияларга министиэристибэтэ
Бу форум Саха Өрөспүүбүлүкэтин Уопсастыбаннай палататын көҕүлээһининэн, Арассыыйа Уопсастыбаннай палататын дьиэ кэргэн, демография, оҕо саас хайысхатын хамыыһыйатын уонна Саха Өрөспүүбүлүкэтин Бырабыыталыстыбатын өйөбүлүнэн ыытылларын туһунан СӨ Ыччат дьыалаларыгар уонна социальнай коммуникацияларга миниистирэ Степан Саргыдаев кэпсээтэ.
— Билигин бары билэрбит курдук, улахан маассабай тэрээһиннэр бобуллан турар кэмнэригэр форум тэрээһиннэрэ барыта онлайн эрэсииминэн ыытыллыаҕа.
Форум сүрүн сыала дьиэ кэргэн, оҕо саас эйгэтигэр туһуламмыт судаарыстыбаннай былаас бэлиитикэтигэр уонна ити эйгэ сайдыытыгар туһуламмыт «2027 сылга диэри оҕо саас уон сылыгар» бырагыраамаҕа тустаах этиилэри киллэрии, гражданскай уопсастыба, былаас, кэмиэрчэскэйэ суох тэрилтэлэр, наука, үөрэҕирии эйгэтэ бары бииргэ түмсэн сүбэлэһии, инники былааннары ырытыы, соруктары торумнаһын буолар. Бу улахан суолталаах форумна биһиги Ыччат дьыалаларыгар уонна социальнай коммуникацияларга министиэристибэбит тутаах толорооччунан буолар.
Ону тэҥэ Доруобуйа харыстабылын, Үөрэҕирии, Үлэ уонна социальнай сайдыы, Ис дьыала министиэристибэлэрэ кыттыыны ылыахтара, — диэн салгыы миниистир эбэн эттэ.
— Степан Анатольевич, ханнык тэрээһиннэр, былаһааккалар ыытыллалларый?
— Форум барыта 8 араас хайысханан ыытыллыаҕа, ол курдук: оҕо доруобуйатын харыстабыла, оҕо саас инфраструктурата, оҕо көмүскэллээх буолуута, доруобуйаларыгар хааччахтаах оҕолор олохторун туруга, оҕо сайдыыта, үөрэхтээһин уонна иитии, дьиэ кэргэн, оҕолоох дьиэ кэргэн туруктааах буолуулара, оҕо саас эйгэтигэр сокуоннар уонна «Инвестиции в раннее детство – основа будущего» эрэгийиэннэр икки ардыларынааҕы кэмпириэнсийэ.
Ити хайысхалар чэрчилэринэн араас хабааннах сэминээрдэр, төгүрүк остуоллар ыытыллыахтара.
Онтон форум оҕо сайдыыта, үөрэхтээһин уонна иитии хаайысхатын бастакы тэрээһининэн «Эркээйи эргиирэ» быгарыыма тула төгүрүк остуолтан саҕаланыаҕа. Сүрүн тэрийээччинэн Үөрэҕирии министиэристибэтэ буолар.
«Инвестиции в раннее детство – основа будущего» эрэгийиэннэр икки ардыларынааҕы кэмпириэнсийэ форум иһинэн ыытыллар тэрээһиннэртэн биир бэлиэ тэрээһининэн буолар. Бу кэмпириэнсийэни Үүнэр көлүөнэ тус сыаллаах пуондата иилээн-саҕалаан ыытар. Кэмпириэнсийэ кыттыылаахтара оскуола иннинээҕи үөрэхтээһин сайдыыта Арассыыйа уонна аан дойду таһымыгар хайдах сайдыбытын ырытахтара, социальнай өҥөлөр дьайыыларын, оҕо кыра сааһыттан үөрэхтээһинигэр суолтатын көрүөхтэрэ.
Бу кэмпириэнсийэҕэ Араас эрэгийиэннэриттэн федеральнай таһымнаах экспертар кыттыахтара. Ол курдук, Хабаровскай кыраай, Сахалинскай, Омскай, Новосибирскай, Иркускай уобаластар, Нижнэй Новгород, Москва, Санкт-Петербург куораттар кытталларын биллэрэн олороллор.
Ону таһынан, форум чэрчитинэн «Я и Россия: мечты о будущем» диэн Бүтүн Арассыыйатааҕы айар-тутар эйгэ куонкуруһун эрэгийиэннээөи түһүмэҕэ ыытыллар, «Нэһилиэнньэ социальнай көмүскэлгэ наадыйар араҥатыгар өйөбүл уонна көмө сайдыыта» диэн онлайн-сэминээр, «Кохлеарнай имплантация кэнниттэн олох» диэн кэмпириэнсийэ, интеллектуальнай квиз-оонньуулар, «Бизнес школа» тэрээһиннэрин презентацията, оскуола саастаах оҕолорго чөл олоххо туһуламмыт видео-уруоктар онтон да атын туһалаах, интэриэһинэй тэрээһиннэр баар буолуохтара.
— Форум бырагырааматын уонна тэрээһиннэр ссылкаларын хантан булабыт?
— «Төгүрүк остуолларга», сэминээрдэргэ кыттарга ссылкалар бырагыраамаҕа барыта сурулла сылдьыаҕа. Бырагырааманы Уопсастыбаннай палата уонна биһиги министиэристибэбит официальнай саайтыгар бүгүн таьаарыахпыт. Ону тэҥэ, өрөспүүбүлүкэтээҕи информационнай саайтарга, социальнай ситимнэргэ хото тарҕаныаҕа.
Онон бука барыгытын «Арассыыйа инникитин туһугар — аныгы көрүүлэр» эрэгийиэннэр икки ардыларынааҕы онлайн форумҥа көхтөөхтүк кыттаргытыгар ынырабыт!
СӨ Ыччат дьыалаларыгар уонна социальнай коммуникацияларга министиэристибэтэ