Бэс ыйын 10-12 күннэригэр М.К.Аммосов аатынан Хотугулуу-Илиҥҥи федеральнай университекка “Университеттар уонна Арассыыйа геостратегическай сирин-уотун сайдыыта” II пуорум ыытыллыаҕа.
Үөрэх уонна наука министиэристибэтин, Наука Арассыыйатааҕы академиятын уонна Саха сирин бырабыыталыстыбатын өйөбүллэринэн ыытыллар пуорумҥа геостратегическай сир-уот сайдыытыгар, эрэгийиэннэргэ интеграционнай хамсааһыннарга уонна уопсастыба, былаас, биисинэс хардарыта бииргэ үлэлээһиннэригэр университеттар оруолларын өссө төгүл атын өттүнэн көрүөхтэрэ.
ХИФУ ректора Анатолий Николаев иһитиннэрэринэн, пуорум Арассыыйаҕа үрдүк үөрэх, наука эйгэлэригэр, ыччат бэлиитикэтигэр судаарыстыба бэлиитикэтин соруктарын дьүүллэһэр былаһаакканан буолуоҕа. Кини тоһоҕолоон бэлиэтииринэн, федеральнай университеттар үрдүк үөрэх систиэмэтин бигэ туругун төрүөтүнэн буолуохтаахтар.
ХИФУ проректора Василий Саввинов экэнэмиичэскэй уонна социальнай сайдыыларынан, нэһилиэнньэ олоҕун хаачыстыбатынан атын эрэгийиэннэртэн биллэ хаалар геостратегическай сир-уот РФ сайдыытын судаарыстыбаннай стратегиятынан салайтарыахтаахтааҕын туһунан эттэ.
Пуорумҥа ону тэҥэ дойду экэниэмикэтин, экэниэмикэ сайдыытын кииннэрин оҥоруу кэскилин, эрэгийиэннэр социальнай-экэнэмиичэскэй сайдыыларын барыллааһын уонна моделлааһын боппуруостарын уо.д.а. дьүүллэһиэхтэрэ.
Тэрээһин кэмигэр Арктиканы чинчийиилэргэ Арассыыйа-Азия консорциумун тэрийэр туһунан меморандумҥа илии баттаныаҕа.
2021 сыллаахха буолбут бастакы пуорумҥа курдук, ыччат социальнай актыыбынаһын саҥа көрүҥнэрин дьүүллэһии, гражданскай уонна патриотическай иитиигэ университеттар кейстарын көрүү былааннанар. Дойду социальнай-экэнэмиичэскэй, бэлитиичэскэй уонна конфессиональнай уратыларын ыччат үчүгэйдик өйдүүрүгэр көмөлөһөр көдьүүстээх быраактыкалары көрдүүр билигин хаһааҥҥытааҕар да суолталаах.
Пуорумҥа ону таһынан Арассыыйа норуоттарын төрөөбүт тылларыгар уонна литературатыгар үөрэнээччилэр бастакы федеральнай олимпиадаларын түмүгүн таһаарыахтара. 2021-2022 үөрэх дьылыгар аҕыс тыл: башкирскай, ненецкэй, татарскай, чеченскэй, эбэҥки, эбээн, дьүкээгир уонна саха тыла киирбиттэрэ.
Нуучча тылын Азия дойдуларыгар таһаарыы инники кэскилэ уонна стратегическай партнердары кытары үтүө сыһыан сайдыытын боппуруостара “Русский мир Азии” норуоттар икки ардыларынааҕы научнай-бырактыычаскай кэмпэриэнсийэ тиэмэтинэн буолуохтара.
Надежда ЕГОРОВА, «Саха сирэ», edersaas.ru