Маны аах Тырааныспар

Арассыыйа эрэгийиэннэригэр 4 тыһ. тахса  оскуола оптуобуһа уонна 1,6 тыһ. суһал көмө массыыната тиийиэҕэ

Арассыыйа эрэгийиэннэригэр 4 тыһыынчаттан тахса  оскуола оптуобуһа уонна 1,6 тыһыынча  суһал көмө массыыната тиийиэҕэ

Бэрэсидьиэн сорудаҕынан бырабыыталыстыба суһал көмө массыыналарын паааркатын саҥардыыга уонна оскуола оптуобустарын атыылаһыыга үлэни ыытар. Чугастааҕы кэмҥэ эрэгийиэннэргэ 6 тыһ. кэриҥэ маннык массыына тиийиэҕэ. Бу туһунан дьаһалга бырабыыталыстыба бэрэссэдээтэлэ Михаил Мишустин илии баттаата.

От ыйыгар бу сыалга саппаас пуондаттан 2021 сылга 15,3 млрд солкуобай көрүллүбүтэ. Мантан оскуола оптуобустарын атыылаһыыга 10 млрд кэриҥэ көрүллүбүтэ. Бу үбүнэн 4187 саҥа массыынаны атыылаһаллар. Массыыналар үксүн тыа сирин оройуоннарыгар ыытыллыахтара.

Үп сорҕото – 5,5 млрд тахса солкуобай суһал көмө массыыналарын атыылаһыыга туттуллуоҕа. Бу харчынан 1625 массыынаны тыа сирин поселениеларыгар атыылаһыахтара.

“Саҥа тырааныспар кэлиитэ тыа сиригэр уонна тэйиччи сытар оройуоннарга олус суолталаах. Оҕолор үөрэнэ барар, оттон быраастар түргэнник ыарыһахха кэлэр кыахтаныахтара”, — диэтэ Михаил Мишустин бырабыыталыстыба мунньаҕар балаҕан ыйын 3 күнүгэр.

Саҥа массыыналарынан Минпромторг хааччыйыаҕа.

Арассыыйа бырабыыталыстыбатын саайтыттан

Бэлэмнээтэ Женни Стрюкова

Хаартыска: тустаах саайтан

0
0