Арассыыйа Донецкай уонна Луганскай Народнай Өрөспүүбүлүкэлэр көҥүл буолууларын билиннэ
Олунньу 21 күнүгэр киэһэ РФ бэрэсидьиэнэ Владимир Путин Донецкай уонна Луганскай Народнай Өрөспүүбүлүкэлэрэ көҥүл буолалларын билинэр туһунан ыйаахха илии баттаата.
Ону сэргэ Владимир Владимирович Донецкай уонна Луганскай Народнай Өрөспүүбүлүкэлэрин лидердэрин Денис Пушилины, Леонид Пасечнигы кытары дойдулар доҕордоһууларын, хардарыта көмөлөсүһүүлэрин туһунан дуогабарга илии баттаста.
Владимир Путин бу өрөспүүбүлүкэлэр көҥүл буолууларын уонна суверенитеттарын билинэр туһунан ыйаахха илии баттыан иннинэ Арассыыйа дьонугар иһитиннэрии оҥордо. Кини Украинаҕа, Донбасска балаһыанньа уустугурбутун этэн туран, Украина бу өрөспүүбүлүкэттэн байыаннайдарын таһаарарыгар күһэйдэ.
— Өссө төгүл санатыам этэ, Украина ыаллыы олорор дойдубут эрэ буолбакка, биһиги историябыт, култуурабыт сорҕото, биһиги биир духуобунай эйгэҕэ олоробут. Украинаҕа аймахтарбыт, доҕотторбут олороллор. Донецкай уонна Луганскай Народнай Өрөспүүбүлүкэлэрин көҥүллэрин уонна суверенитеттарын билинии билигин эрэ күөрэс гыммыт боппуруос буолбатах, бу сиппит-хоппут боппуруос. Онон бу өрөспүүбүлүкэлэри билинэр туһунан ыйаахпын Федерация Сэбиэтэ өйүүрүгэр көрдөһөбүн. Уонна доҕордоһуу уонна хардарыта көмөлөсүһүү туһунан дуогабары ратификациялыырга ыҥырабын. Украина Донбасска байыаннай дьайыыларын тохтоппот түгэнигэр, салгыы хаан тохтуута барыта Украина билигин салайа олорор салалтатын суобаһыгар хаалыаҕа, — диэн иһитиннэрдэ.
Аграфена КУЗЬМИНА