Атырдьах ыйын 22 күнүгэр Арассыыйа былааҕын күнүн бэлиэтиэхпит.
Лоп курдук 30 сыл анараа өттүгэр, 1991 сыл атырдьах ыйын 22 күнүгэр, Москваҕа Үрүҥ дьиэ үрдүгэр дойду устуоруйатыгар тосту уларытыыны киллэрбит, саҥа тутулу кэрэһилиир үс өҥнөөх судаарыстыбаннай былаах тэлибирэччи ыйаммыта. Бу күнтэн ыла үрүҥ, халлаан күөҕэ уонна кыһыл өҥнөрдөөх былаах гиэрбэни уонна өрөгөй ырыатын кытары Арассыыйа саҥа судаарыстыбаннай бэлиэтинэн буолбута.
Бу бэлиэ күнү көрсө СӨ Ыччат дьыалаларыгар уонна социальнай коммуникацияларга министиэристибэтэ Саха сирин үөрэнээччилэрин Арассыыйатааҕы хамсааһынын кытта «Былааҕы көтөҕөбүт» диэн патриотическай хабааннаах аахсыйаҕа кыттарга ыҥыраллар. Аахсыйа өрөспүүбүлүкэ олохтоохторо судаарыстыбаннай бэлиэлэри уонна дойдубут киэн туттар сирдэрин билэргэ туһаайыллар.
Манна үөрэнээччилэр хамсааһыннарын актыбыыстара, оҕо уонна ыччат уопсастыбаннай тэриллиилэрэ кытталлар. Аахсыйаҕа кыттар туһуттан, олорор пууҥҥут тутаах сиригэр (үрдүк туочукатыгар, хайаҕа, сыырга, искибиэргэ, пааркаҕа уо.д.а) Арассыыйа былааҕын көтөҕөн хаартыскаҕа түһэн, бэлиэ сир туһунан кылгастык суруйан, «Инстаграмҥа» таһаарар ирдэнэр.
Итиэннэ @rdshyakutia @minmolykt @pleshcheva @alexkudryash @skm_rus аккауннары уонна #рдш #рдшсаха #минмолсоцком #деньфлагавЯкутии хэштегтэри бэлиэтиир наада.
СИА хаартыската.