Сиэрпэлээх өтүйэ ойуулаах уот кыһыл былааҕы солбуйан, Арассыыйа үс (үрүҥ, халлаан күөҕэ уонна кыһыл) өҥнөөх былааҕа 1991 сыллаахха атырдьах ыйын 22 күнүгэр Москваҕа Үрүҥ дьиэ үрдүнэн тэлибирээбитэ.
edersaas.ru
Ити күн РСФСР Үрдүкү Сэбиэтин Суһал ыҥырыылаах сиэссийэтэ бу былааҕы Арассыыйа национальнай былааҕынан билинэр туһунан уурааҕы ылыммыта. Онтон ыла үрүҥ, халлаан күөҕэ уонна кыһыл дьүһүннээх былаах гиэрбэни уонна гимни кытары Арассыыйа саҥа судаарыстыбатын официальнай судаарыстыбаннай бэлиэтэ буолбута. Бэрэсидьиэн Борис Ельцин 1994 с. атырдьах ыйын 20 күнүгэр таһаарбыт ыйааҕынан, атырдьах ыйын 22 күнэ Арассыыйа Федерациятын Судаарыстыбаннай былааҕын күнүнэн олохтоммута.
Саха Өрөспүүбүлүкэтэ бу дьоһун даататтан туора турбат. Атырдьах ыйын 16 күнүттэн саҕалаан бибилэтиэкэлэргэ, мусуойдарга аһаҕас аан күннэрэ, быыстапкалар, көрсүһүүлэр тэриллэллэр.
Бүгүн, атырдьах ыйын 22 күнүгэр, Туймаада туонатыттан саҕалаан, хас биирдии улууска, нэһилиэккэ үөрүүлээх миитиннэр тэрилиннилэр, Арассыыйа былаахтара күөрэччи көтөҕүлүннүлэр.
Дьокуускайга Ленин болуоссатыгар тэриллибит миитини арыйарыгар Бырабыыталыстыба Бэрэссэдээтэлэ Владимир Солодов бу күн суолтатын туһунан тоһоҕолоон бэлиэтээтэ:
—Арассыыйа былааҕын күнэ — дойдуну сомоҕолуур, таһаарыылаах үлэҕэ, эйэлээх олоххо көҕүлүүр, сыллата үрдүк таһымҥа бэлиэтэнэр бырааһынньык. Бу күн хас эрэгийиэн, куорат уонна нэһилиэнньэлээх пууннар ахсын Арассыыйа судаарыстыбаннай символларын суолталарын быһаарар дьаһаллар, патриотическай аахсыйалар ыытыллаллара ордук чуолаан эдэр ыччаттарга улахан иитэр-өйдөтөр суолталаах.
Раиса Сибирякова, «Саха сирэ» хаһыат, edersaas.ru