Арассыыйа быйылгы түһүлгэтигэр Саха сирин тустууга оскуолатын уон үс иитиллээччитэ кыттыаҕа

Саха бөҕөстөрө Уһук Илиҥҥи уонна Киин федеральнай уокуруктар күрэхтэһиилэригэр соргулаахтык тустан, дойду чөмпүйэнээтигэр уон үс путевканы ыллылар.

Роман Попов, “Саха сирэ” хаһыат, https://edersaas.ru

Ол курдук, Уһук Илиҥҥи уокурукка бастыыр иһин күрэхтэһиигэ алта кыһыл көмүс, биэс үрүҥ көмүс, алта боруонса мэтээллэри ыллылар. Дмитрий Аксенов (57 кг диэри), Николай Охлопков (61 кг диэри), Константин Власов (65 кг диэри), Герман Устинов (70 кг диэри), Дьулустаан Сивцев (74 кг диэри) уонна Евгений Алексеев (125 кг диэри ыйааһыҥҥа) пьедестал үрдүкү үктэлин дабайдылар. Кинилэри сэргэ, иккис миэстэлээхтэр — Федор Постников, Эдуард Григорьев, Ларион Андреев, Тимур Николаев, Ньургун Сергин — дойду чөмпүйэнээтигэр кыттар быраабы ыллылар.

Киин федеральнай уокурукка ыйааһыннарыгар иккис буолбут Айсен Копырин (70 кг диэри) уонна Михаил Иванов (57 кг диэри) эмиэ Арассыыйа түһүлгэтигэр кыттыахтара.

Санатар буоллахха, дойду көҥүл тустууга быйылгы чөмпүйэнээтэ бэс ыйын 12-15 күннэригэр Ингушетия Назрань куоратыгар буолар.

Роман Попов, “Саха сирэ” хаһыат, https://edersaas.ru