«Глобал таймс» Дьокуускайы Арассыыйа топ-5 куоратыгар (топ-5) киллэрбит.
Дьокуускай, Кызыл, Дербент, Грознай уонна Элиста Арассыыйа саамай ураты куораттара диэн «Глобал таймс» [globaltimes.cn] хаһыат иһитиннэрбит.
Кытай изданиета бэлиэтээбитинэн, Арассыыйаҕа 200 курдук этническэй бөлөх, элбэх эрэгийиэн бэйэтин төрөөбүт тылын-өһүн, култууратын харыстыырын туһунан этиллибит. Маннык сирдэр элбэҕэ суохтарын уонна Арассыыйа атын куораттарыттан уратыларын, дириҥник чинчийэн үөрэтиилэр ыытыллыахтарын сөптөөҕүн туһунан этиллибит. Матырыйаал «Россия в перспективе» хаһыакка тахсыбыт.
«Глобал таймс» Дьокуускайы Арассыыйа биир сөҕүмэр ураты куоратынан ааттыыр. «Манна сахалыы колорит, хоту сир 50 кыраадыстаах тымныы уонна ирбэт тоҥноох дойду архитектурата дьүөрэлэһэллэр», —
диэн суруллубут. Куораты тутуу уратытыгар дьиэлэри атахха тутууну киллэрбит. Маны сэргэ, уратыларга тымныы күннээх-дьыллаах дойдуга кэтиллэр тыс этэрбэстэри киллэрэр. «Кыһынын дьон-сэргэ үгэс курдук этэрбэс кэтэр — сымнаҕас уллуҥнаах түүлээх атах таҥаһа уонна хаатыҥка. Тоҕо диэтэххэ, көннөрү атах таҥаһынан олус тымныы» диэн бэлиэтээбит.
Маны сэргэ, Саха сирин дьоно-сэргэтэ төрөөбүт айылҕаларын кэрэтин уонна уратытын харыстыырга, ону элбэтэргэ дьулуһаллара ахтыллыбыт. «Тумаҥҥа дьон-сэргэ хайысханы быһаарарыгар анаан, дьиэ тас истиэнэлэрэ чаҕылхай кырааскалаахтар» — диэн суруллубут.
«Глобал таймс» маны сэргэ, эдэрдэр Дьокуускайга саҥа пааркалары уонна сынньанар сирдэри тутарга үлэлэһэллэрин ыйбыт. «Архитектордар саҥардыллыбыт куораты көрүөхтэрин баҕараллар, биһиги сорукпутунан күн-дьыл уратытын учуоттаан туран, уопсастыбаннай эйгэни тэрийии буолар», — диэн архитектор Сергей Пермяков этиитэ киллэриллибит.
Дьокуускай — Сибиир кырдьаҕас куораттарыттан биирдэстэрэ. 1632 сыллаахха олохтоммута. Бүгүн Дьокуускай — бөдөҥ административнай, бырамыысыланнай, культурнай уонна научнай киининэн буолар. Уһук Илин федеральнай уокурукка биир саамай дьайыылаахтык хамсыыр куораттартан биирдэстэрэ, нэһилиэнньэтин ахсаанынан Уһук Илин федеральнай уокурукка бэһис миэстэни ылар.
СӨ Ил Дархан уонна Бырабыыталыстыба пресс-сулууспата
Мария Васильева хаартыскаҕа түһэриитэ
