Чурапчы улууһун уопсастыбыннай тэрилтэлэрэ РФ Бэрэсидьиэнин граннарын сүүйдүлэр.
Бэлиэтээн эттэххэ, 2020 сылга Саха сириттэн Бэрэсидьиэн граннарын пуондатын II түһүмэҕэр 140 сайаапка киирбит. Итилэртэн пуонда өйөбүлүн 24 сайаапка ылбыт.
Ол курдук, «Сохранение исторической памяти» хайысхаҕа бэриллэр граны «Көлүөнэлэр кэм нөҥүө кэпсэтиилэрэ» диэн ааттаах “Утум” социальнай эйгэни сайыннарыынан дьарыктанар тэрилтэ бырайыага ылбыт. “Утум” тэрилтэ Болтоҥо нэһилиэгэр үлэлиир.
Хоптоҕотооҕу “Патриоттар сэбиэттэрэ” социальнай эйгэни сайыннарыыга үлэлиир тэрилтэ оҥорбут “Биһиги — тыа сирин кэскилэбит!” диэн ааттаах сыл устата үлэлиир оҕо лааҕырыгар бырайыага «Охрана здоровья граждан, пропаганда здорового образа жизни» хайысха гранын кыайыылааҕынан тахсыбыт.
Чурапчылар сүүйбүт үһүс граннара — «Поддержка проектов в области науки, образования, просвещения» хайысха. Бу кыайыыны “Чурапчы улууһугар доруобуйаларыгар хааччахтаах оҕолору өйүүр уонна сайыннарар киин” «Радужные сезоны» диэн ааттаах бырайыагынан ситиспит. Үс кыайыылаах бырайыакка уопсайа 3 153 336,00 солк. суумалаах граннар туттарыллыахтара.