Бу күннэргэ Дьокуускайга Арассыыйа эригийиэннэриттэн кэлбит учуонайдар кыттыылаах Арктика стратегическай сайдыытыгар туһуламмыт I Көһө сылдьар научнай мунньахха дойду научнай кииннэрэ биир үлэлээһиннэрин тула кэпсэтии буолла.
Арассыыйа Наукаларын академиятын Карелиятааҕы научнай чинчийэр киин генеральнай дириэктэрэ, биологическай наука доктора Ольга Бехмет дойду Арктическай зонатыгар чинчийиини муҥутуурдук сайыннарар туһугар научнай кииннэри бииргэ түмэн, уопсай хайысхалаах үлэни ыытар наадатын бэлиэтээтэ.
— Дьокуускайга буолан ааспыт Көһө сылдьар мунньахха Арассыыйа Арктикатын учуонайдара бырамыысаланнас салаатыттан саҕалаан, ойууру харыстааһыҥҥа, култуура, доруобуйа, үөрэхтээһин боппуруостарыгар, социальнай усулуобуйаны сайыннарыыга тирээн туран кыһалҕалары дьүүллэстибит.
Бу кэпсэтии түмүгэр ырыппыт боппуруостарбытын кэлимник быһаарыы эрэйиллэр буолан, биир эригийиэн эрэ тула буолбакка, Арктика зонатын учуонайдара бары бииргэ түмсэн, сомоҕолоһон үлэлиирбит – кэм ирдэбилинэн буолла, — диэн санаатын үллэһиннэ Карелия учуонайа Ольга Бехмет.
Елена ПОТОЦКАЯ, “Саха сирэ” хаһыат, edersaas.ru
Хаартыска — Андрей Сорокин, СИА.