Арассыыйа Арктикатааҕы бөлөҕөр Саха сирин 8 улууһун киллэрии түмүктэнэн эрэр
Арассыыйа Уһук Илини уонна Арктиканы сайыннарыыга министиэристибэтин сайтыгар иһитиннэрбиттэринэн, дойду Арктикатааҕы бөлөҕөр Саха сирин 8 оройуонун киллэрэр үлэ түмүктэнэн эрэр.
“Сокуон барыла Арассыыйа Арктикатааҕы зонатын резиденэ өйдөбүлү киллэрэр. Манна 4 регион сирин-уотун киллэрэр, оттон муниципалитеттар ахсааннара 27 диэри элбээтэ. Билигин Саха Өрөспүүбүлүкэтин 8 улууһун эбии киллэрэр үлэ түмүктэнэн эрэр”, — диэн тустаах министиэристибэ сайтыгар этиллэр.
Санатан эттэххэ, билигин Арктика зонатыгар биэс оройуон киирэр – Аллайыаха, Анаабыр, Булуҥ, Аллараа Халыма уонна Усуйаана. Бу бөлөххө өссө 8 оройуон киириэхтээх: Абый, Үөһээ Халыма, Дьааҥы, Эдьигээн, Муома, Өлөөн, Орто Халыма уонна Эбээн Бытантай. Бу улуустар бары Арктика хоту кыраныыссатыгар сыталлар уонна полярнай эргимтэҕэ толору эбэтэр сорох чаастара киирсэллэр.
Билигин министиэристибэ Арассыыйа Арктикатааҕы зонатын усулуобуйатыгар бырайыактар экэниэмикэ өттүнэн көдьүүстээх буолууларын хааччыйар преференцияларынан тиһигин туһунан сокуон барылын бэлэмнээтэ.
Миниистири солбуйааччы Александр Крутиков бэлиэтээбитинэн, преференцияларынан туһаныыга икки усулуобуйа ирдэнэр – бырайыакка инвестиция кээмээй 500 тыһ. солк. саҕаланар, ону тэҥэ Уһук Илини уонна Арктиканы сайыннарыы корпорациятын кытта инвестиция үлэтин ыытыы туһунан сөбүлэһии түһэрсиллиэхтээх.
Маныаха Арктика зонатыгар бары инвестордарга түһээн усулуобуйата ыарыа суоҕа. Резиденнэргэ көҥүл таможня зоната олохтонуо, таһаҕаһы толоруу болдьоҕо түргэтиэҕэ, ону тэҥэ түһээн кыратык түһүөхтээх.
Түһээҥҥэ чэпчэтиилэр инвестордар 4 бөлөхтөрүгэр көрүллэр – Арктика шельфэтигэр муоратааҕы саҥа сир баайдаах сирдэргэ углеводороднай сырьену хостооһун эйгэтигэр, атын сир баайын хостуур бырайыактарга. Бары категорияларга страховка усунуоһа 30 бырыһыантан 7,6 диэри аччыахтаах. Оттон геологическай-чинчийэр үлэлэргэ ороскуоттарга коэффициент 3,5 диэри үрдээтэ.
Арассыыйа бэрэсидьиэнин Владимир Путин сорудаҕынан сокуон барыла Судаарыстыбаннай Дуумаҕа 2019 сыл от ыйын 1 күнүгэр диэри киллэриллиэхтээх.
Аркадий Васильев, СИА.