Уопсастыба Успуорт

Мас тардыһыытыгар Арассыыйа чөмпүйүөнэ – 17 саастаах Ньурба кыыһа

Уһун кэмнээх ардах түстэ даҕаны, 800-тэн  тахса нэһилиэнньэлээх Хорула улуус киинин кытта суола алдьанан, олохтоохтор кыһалҕаттан ДТ-75, «Беларусь»  тыраахтар кэннигэр иилиллибит  хомуоска олорсон, буксуйа-буксуйа биир суукка 175 км  айаннаан, аан дойду кумаарыгар бары сиэтэн, ээхтэрин этэн улуус киинин булаллар. 

edersaas.ru

 

Ол иһин бу быйаҥнаах, бултаах-алтаах сиргэ дьон киэнэ чулуута,  күүстээҕэ күн сирин көрөр. Биир оннук үтүө холобурунан  мас тардыһыытыгар 80 кг  үөһээ ыйааһыҥҥа Арассыыйа абсолютнай чөмпүйүөнэ 17 саастаах Юлия Михайлова буолар. Хаартыскалары көрдөххө, толору эттээх-сииннээх, бөдөҥ-садаҥ  нуучча кыргыттарын илиитин күүһүнэн баһыйбыт саха кыыһын хайдах эрчийэн таһаарбытын туһунан тириэньэрэ, оскуола дириэктэрэ  Павел Николаевич Васильев маннык  кэпсиир: «Бэйэм физкултуура учуутала идэлээх буоламмын, оҕо илии-атах оонньуутугар дьоҕурдааҕын суоҕун кыратыттан  тута көрөн билэбин. Юляны мас тардыһыытыгар 5 кылаастан дьарыктаабытым. Бастакы күрэҕэр Ньурбачааҥҥа улууска бастаабыта. Бүлүү бөлөх улуустарыгар эмиэ тэҥнээҕин булбатаҕа, кими да тулуппакка, абсолютнай чөмпүйүөннээбитэ. Күрэхтэстэҕин аайы ис кыаҕа арыллан испитэ.

Былырыын мас тардыһыытыгар өрөспүүбүлүкэҕэ 80 кг үөһээ ыйааһыннаах кыргыттарга бастаабыта. Онон, Арассыыйа таһымыгар саас Калуга куоракка күрэхтэһэ барарга путевка ылбыта. Кини ыйааһыныгар 7-8 кыыс баар этэ. Ону пауэрлифтиҥҥэ маастар нуорматын толорбут кыыска кыайтаран кэбиһэн, иккис миэстэҕэ тиксэн кыһыйыы-абарыы бөҕө буолбуппут.

80 кг үөһээ  ыйааһыҥҥа – Юлия Михайлова

Кыыспыт хайаан да бастыахтаах диэн эрэллээх этибит, ол иһин  инники күрэхтэһиилэри ырытан көрөн баран,  балаҕан ыйыгар Анапа куоракка «Бойобуой искусство XIII спортивнай оонньууларыгар» оҕолорго мас тардыһыытыгар Арассыыйа чемпионатыгар айаҥҥа туруммуппут. Онно тиийэн, утарсааччыларын барыларын тоҕо тардан ылан, кыайыы үрдүккэ кынаттыыр өрөгөйүн билбитэ».

Бу саас Күүстээх Дэһээккин бирииһигэр муҥутуур күүстээх бөҕөстөр улахан дьон чемпионатыгар киирсибиттэрэ. Онно кыттарга сокуоннай сааһын туола илик оскуола оҕото ыспыраапка ылан, Нерюнгриттан сылдьар Татьяна Григорга кыайтаран, иккис миэстэ буолбута. Ол да буоллар, Юля Хорулаттан КМС нормативын бастакынан толордо. Оскуоланы бүтэрдэҕинэ, Дьокуускайга ИФКиС-кэ үөрэнэ барар санаалаах.

«17-лээх оҕоҕо 80 кг  үрдүк ыйааһын ноҕурууска буолбатах дуо, спортсмен буолан баран, тоҕо ыйааһынын түһэрбэтий?» – диэн ыйыппыппар, тириэньэрэ: “Ыра сатыыр туһунан боппуруос турбат. Юлия бэйэтигэр оруобуна сөп, илиитэ-атаҕа атлет көрүҥнээх, кини бу ыйааһыныгар кыайыылаахтык-хотуулаахтык киирсэр. Аны күһүн Дьокуускайга аан дойду чемпионата буолуохтаах, тириэньэрдэр кыыһы билэллэр, кэтэһэллэр», — диэн эттэ.

Онон, ыарахан ыйааһыҥҥа биһиэхэ даҕаны киһи эрэнэр спортсменнара бааллар эбит диэн киһи эрэх-турах сананар. Сахалары үксүн кыра-хара курдук саныыллар даҕаны, олоххо биирдиилээн бөдөҥ дьон бааллар.

Марианна Тыртыкова, «Саха сирэ», edersaas.ru

1
0
Telegram Whatsapp

Добавить комментарий