Доруобуйа Маны аах

Арассыыйаҕа «омикроҥҥа» сыстыһыы үс төгүл үрдээтэ

Саҥа дьыллааҕы бырааһынньык, уһун өрөбүл күннэригэр Арассыыйаҕа коронавирус саҥа  “омикрон” штаммынан сыстыһан ыалдьыы үс төгүл үрдээн, 305 киһиэхэ тэҥнэстэ диэн “Роспотребнадзор” салайааччыта Анна Попова иһитиннэрдэ.

Кини этэринэн, 2022 сыл бастакы нэдиэлэтигэр дойдуга “ковидынан” ыалдьыы 19,4% намтаабыт. Нэдиэлэ устата барыта 112 006 киһи ыалдьыбыт. 13 эрэгийиэҥҥэ “омикрон” штаммыгар сыстыһыы баар.

2022 сыл бастакы нэдиэлэтин түмүгүнэн, сууккаҕа ортотунан 100 тыһыынча киһиэхэ коронавируснай инфекцияны булар 239 анаалыс оҥоһуллубут. Ити билигин бэриллибит нуорматтан намыһах, онон ыарыыны булууга, учуоттааһыҥҥа эмиэ дьайбыт буолуохтаах, — диэн Анна Попова эттэ.

Биллэрин курдук, “омикрон” штамм билигин тарҕаммыт “дельтатааҕар” быдан сыстыганнаах. Ол иһин Саха сиригэр кэккэ миэрэлэри ылыналлар. Бастатан туран, олус элбэх киһи ыарыйдаҕына, доруобуйа харыстабылын тэрилтэлэрэ улахан ноҕурууската суох үлэлииллэрэ хааччыллыахтаах. Өрөспүүбүлүкэтээҕи суһал ыстаап салайааччытын солбуйааччы Ольга Балабкина иһитиннэрбитинэн, итиннэ туох баар миэрэлэр ылыллыбыттар, мэдиссиинэ тэрилтэлэрэ бэлэмнээхтэр.

Бу иннинэ Ил Дархан Айсен Николаев саҥа “омикрон” штамм тохсунньуга Саха сиригэр кэлиэн сөп, онно бэлэмнээх буолуохтаахпыт диэн этэн турар.

Билигин тумуу сибикилэрэ баар буоллахтарына, ханна да барбакка, бырааһы дьиэҕэ ыҥырыахтааххыт. Быраас кэлэн, коронавируска анаалыһы ылыахтаах. Түмүгэ биир суукканан биллэр. Бу курдук гынан, сыстыһыыны, ыалдьыыны тохтотуохтаахпыт, харыстанар миэрэлэри эмиэ умнуо суохтаахпыт.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru

0
0
Telegram @edersaas20