Владимир Путин 2018 сылтан Оҕо саас уон сылын биллэрдэ. РФ бырабыыталыстыбата үс ый иһигэр 2020 сылга диэри ыытыллыахтаах сүрүн тэрээһиннэр былааннарын торумнаан оҥорон киллэриэхтээх. Ити курдук үс сыл буола-буола былаан оҥоһуллар.
Ангелина Васильева, “Саха сирэ” хаһыат, edersaas.ru
90-с сыллартан саҕалаан, дойдуга демографическай кириисис cалҕанан, төрөөһүн аҕыйаан, нэһилиэнньэ ахсаана сыллата кыччаан иһэр. Онон демографияны быыһыыр, оҕо, ийэ доруобуйаларын харыстыыр сыалтан, маннык миэрэлэри ылыннылар.
Барыллаан ааҕыынан, 2015 сылы кытта тэҥнээтэххэ, 2025 сылга төрүүр-ууһуур дьахтар ахсаана 34% аҕыйыахтаах. Онон төрөөһүн эмиэ аҕыйыы турар чинчилээх.
Оҕо саас уон сылын олоххо киллэрэр туһунан этиини Федерация Сэбиэтин спикерэ Валентина Матвиенко 2016 сыл бүтүүтэ киллэрбитэ. Бу хардыы биэс сыллааҕыта ылыллыбыт Оҕо интэриэһин көмүскүүр Национальнай стратегия дьайыыларын салгыахтаах.
Туох сүрүн миэрэлэр ылыллыахтарай? Вице-премьер Ольга Голодец этэринэн, кыра оҕолору дьааһыланан хааччыйыы, ийэ, оҕо доруобуйаларын харыстааһын, төрөөһүнү элбэтии, о.д.а. киириэхтэрэ. “Хас биирдии оҕо доруобай буоларыгар, талаанын арыйарыгар, үчүгэй үөрэх кыһатынан, уһуйаанынан хааччыллан, сөпкө сайдан иһэригэр болҕомто ууруллуоҕа”, — диир кини.
2015-17 cc.ыытыллыбыт Национальнай стратегия иккис түһүмэҕэр оҕолоох ыаллар дьадайыыларын утары миэрэлэр, үөрэх хаачыстыбатын үрдэтии, талааннаах оҕолору өйөөһүн, кырачааннарга күүһүнэн өттөйүүнү тохтотуу, уо.д.а. хайысхаларынан туһуланан үлэ ыытыллыбыт. Ол үлэ түмүгэр, холобур, кэнники биэс сыл иһигэр тулаайах оҕо ахсаана икки төгүл кыччаабыт.
Спикер Матвиенко этэринэн, бу 10 сыл Арассыыйаҕа биир суолталаах, уһун кэмнээх, приоритетнай бырайыак быһыытынан үлэлиэхтээх. Президент ыйааҕа кэмигэр тахсыбыта – Оҕо көмүскэлин күнүгэр бэлэх курдук буолла.
Ангелина Васильева, “Саха сирэ” хаһыат, edersaas.ru
Александр Чебан түһэриитэ.