Дойду Аҕа баһылыга Владимир Путин бүгүн, ыам ыйын 10 күнүгэр, видеоконференция киэбинэн ойуур баһаардарынан сүбэ мунньаҕы ыытта.
Владимир Путин сүбэ мунньах саҕаланыытыгар былырыыҥҥы курдук балаһыанньа үөскээбэтин туһугар үлэ күүскэ ыытыллыахтааҕын бэлиэтээн эттэ. «Бүгүн биһиги эрэгийиэннэргэ турбут ойуур баһаардарын тула кэпсэтиэхпит. Эрэгийиэннэргэ баһаары утары үлэҕэ туһааннаах техника уонна боломуочуйа барыта баар. Билигин хас да эрэгийиэҥҥэ нэһилиэнньэлээх пууннарга ойуур баһаардара турдулар. Номнуо кырата суох хоромньу тахсыбыта биллэр. Хомойуох иһин, киһи өлүүлээх түбэлтэлэр таҕыстылар«, — диэн эттэ.
ЫБМ миниистирин эбээһинэһин толорооччу Александр Чуприян иһитиннэрбитинэн, Арассыыйаҕа 2022 сыл саҕаланыаҕыттан 4 тыһыынча кэриҥэ ойуур баһаара бэлиэтэммит. Курганскай уобаласка, Красноярскай кыраайга, Кемеровскай, Иркутскай, Омскай уонна Новосибирскай уобаластарга 1,3 тыһыынча тутуу уокка былдьаммыт. 16 киһи өлбүт уонна 18 киһи эмсэҕэлээбит. «Уопсайа 2 тыһыынча киһи олорор дьиэтэ-уота суох хаалбыт», — диэн Чуприян иһитиннэрдэ.
Бүгүҥҥү туругунан эрэгийиэннэргэ туох көмө оҥоһуллубутун туһунан губернатордар кэпсээтилэр. Ол курдук Красноярскай кыраайга 1 140 киһи аадырыстаах көмөнү ылбыт.
edersaas.ru