«Морским судам быть» диэн суолдьут санаанан, 1696 сыллаахха алтынньы 30 күнүгэр Петр I туруорсуутунан, Боярдар Думалара Арассыыйа байыаннай флотун төрүттээбиттэрэ. Онтон ыла алтынньы 30 күнэ Арассыыйа байыаннай флотун үөскээбит күнүнэн ааҕыллар. Ол саҕана Воронеж, Санкт- Петербург, Ладога уонна Архангельскай куораттарга байыаннай хараабыллары тутуу күргүөмнээхтик барбыта. Маҥнайгынан Азовскай флотилия уонна Балтийскай флот үөскээбитэ, онтон Тиихэй акыйааннааҕы, Черноморскай, Хотугу флоттар уонна Каспийскай флотилия баар буолбуттара. Арассыыйа байыаннай флотугар сулууспалаабыт саха уолаттарыттан санааларын ыйыталастыбыт.
Дьулустан Иванов, Тиихэй акыйааннааҕы флот адмирал Невельской хараабылын мотуруоһа, ИДьМ үлэһитэ:
— Мин 2015 — 2016 сылларга Владивосток куоракка Тиихэй акыйааннааҕы байыаннай флокка сулууспалаабытым. Муораҕа сулууспалыыр сиргэ сулууспалырдааҕар атын. Үөрэммиппит курдук сиринэн сүүрэ сылдьыбаппыт, хараабылга сылдьага үөрэнэбит. Биэс ый үөрэтэр чааска сулууспалаан баран, «Адмирал Невельской» диэн улахан десантнай хараабылга түбэспитим. Куруук муораҕа араас үөрэххэ сылдьаачыбыт, муора кыраныыссатын харабыллыырбыт. Бииргэ сулууспалаабыт уолаттарбын Арассыыйа байыаннай флота үөскээбит күнүнэн итиитик-истиҥник эҕэрдэлиибин.
Вячеслав Попов, Тиихэй акыйааннааҕы флот «Адмирал Трибуц» хараабылын мотуруоһа, Россгвардия (ОМОН) байыаһа:
— Хараабылга сулууспалыыр диэн туспа олох кэриэтэ. Аармыйаттан туспа быраабылалаах. Флот буоллаҕа дии. Кытаанах доруобуйалаах буолуохха наада. Киһи күнү быһа иллэҥэ суох сылдьыллааччы. Хас биирдии мотуруос бэйэтэ эбээһинэстээх. Японскай, Илин-Кытайскай, Филиппинскэй, Охотскай муораларынан уонна Тиихэй акыйаанынан үөрэххэ сылдьыбыппыт. Сулууспалыы сылдьан элбэх доҕоттордоммутум, билиҥҥэ диэри билсэбит. Арассыыйа байыаннай флотугар сулууспалаабыт ыччаты бүгүҥҥү күнүнэн эҕэрдэлиибин.
ВИДЕО:
Николай Попов, «Саха сирэ» хаһыат, edersaas.ru