Тохсунньу 18 күнүгэр Арассыыйа үрдүнэн коронавирус дьаҥыттан маассабай вакцинациялааһын саҕаламмыта биллэрилиннэ.
edersaas.ru
Дойду Бэрэсидьиэнэ Владимир Путин аналлаах структураларга бу туһунан сорудах биэрдэ. Бүгүҥҥүттэн Арассыыйа бары олохтоохторо коронавирустан быһыыны ылыахтарын сөп. Вакцинацияны икки препарат көмөтүнэн ыытыахтара — «Спутник V» уонна «ЭпиВакКорона». Сотору Чумаков киинигэр оҥоһуллубут үһүс вакцина эбиллиэҕэ. Бырабыыталыстыба бэрэссэдээтэлэ Михаил Мишустин “вакцина былааннаммыт ахсаана кэмигэр толору оҥоһулунна, билигин былааны таһынан оҥорон эрэллэр” диэн Владимир Путинҥа дакылааттаабыт. Билигин вакцинаны ылар сирдэри элбэтиигэ үлэ бара турар.
Роспотребнадзор салайааччыта Анна Попова быһыыны оҥоруу билиҥҥи соругунан, аны күһүҥҥэ диэри Арассыыйаҕа дьоҥҥо-сэргэҕэ иммунитеты үөскэтии. 2021 сылга нэһилиэнньэ 60% быһыыны ылыынан хабыллара күүтүллэр.
Бүгүн коронавирус дьаҥын утары оҥоһуллар быһыыны күргүөмүнэн биэрии тэрээһинэ 50 дойдуга саҕаламмыта биллэр. АХШ-гар бэлиэр 12,2 мөлүйүөн киһи быһыыны ылбыт.
«Саха сирэ» хаһыат, edersaas.ru