Арассыыйаҕа идэни кытта сибээстээх ыарыылары сэрэтиигэ пилотнай бырайыагы үлэлэтиэхтэрэ
Пилотнай бырайыак түмүгэр кимнээх эмтэниэхтэрэй? Манна ааҕыҥ.
Муус устар 1 күнүттэн Арассыыйаҕа идэни кытта сибээстээх ыарыылары сэрэтиигэ пилотнай бырайыагы үлэлэтиэхтэрэ. Бу бырайыак бастакы кыттааччыларынан авиация уонна тимир суол тырааныспарын үлэһиттэрэ буолуохтара. Бу туһунан уураахха Бырабыыталыстыба Бэрэссэдээтэлэ Михаил Мишустин илии баттаата.
Бырайыак чэрчитинэн үлэһиттэргэ медкөрүүнү тэрийиэхтэрэ. Идэлэриттэн сылтаан ыалдьан эрээччилэр Социальнай страховкалааһын пуондатын кииннэригэр сэрэтэр эмтэниини ааһыахтара. Уопсайа 18 күн эмтэниэхтэрэ. Бу кэмҥэ кинилэргэ эбии төлөнөр уоппуска көрүллүөҕэ. Айаннарын ороскуотун эмиэ уйунуохтара.
Бырайыагы Социальнай страховкалааһын пуондата үбүлүөҕэ. Маныаха федеральнай бүддьүөккэ 18,5 мөл. солкуобай көрүллүбүт. Эмтэнии туһунан сибидиэнньэни пилотнай бырайыакка кыттар мэдиссиинэ тэрилтэтин иһитиннэрэр тиһигэр киллэриэхтэрэ.
РФ Бырабыыталыстыбатын саайтыттан
Бэлэмнээтэ Женни Стрюкова
Хаартыска: тустаах саайтан