Арассыыйаҕа Франция посола Саха сирин устудьуоннарыгар ыалдьыттаата
Арассыыйаҕа Франция Боломуочуйалаах Посола хотун Сильви Берманн посольство дэлэгээссийэтин кытта бу күннэргэ биһиги өрөспүүбүлүкэбитигэр кэллэ.
edersaas.ru
Францияттан ыалдьыттары Саха сиригэр туризм уонна маны кытта сибээстээх бреннэр сайдыылара, норуот култуурата уонна искусствота, дьон хайдах олороро интэриэһиргэтэр. Ыччат – аныгы кэм сиэркилэтэ. Ол иһин француз дипломаттарын бырагырааматыгар Арктикатааҕы култуура уонна искусство судаарыстыбаннай институтугар сылдьыы киирбитэ.
Сильви Берманн бу институкка Франция фотограба, мецената уонна айанньыта Франсин Обри быыстапкатын арыллыытыгар кытынна. Институт көрүдүөрдэрин ураты көрүүлээх киһи түһэрбит хаартыскалара киэргэттилэр. Хотун Берманн маны тэҥэ үрдүк үөрэх кыһатын салалтатын, ректор Саргылаана Игнатьеваны кытта көрүстэ. Кинилэр институт үөрэтэр бырагыраамаларын ырыттылар, Франция үрдүк үөрэх кыһаларын кытта бииргэ үлэлиири торумнаатылар. Французтар устудьуоннарбыт талааннарыттан, Саха сиригэр төрүт култуура чөл хаалбытыттан сөхтүлэр-махтайдылар.
АГИКИ кэнники сылларга норуоттар икки ардыларынааҕы сибээһи хаҥатарын бэлиэтиир тоҕоостоох. Ол курдук, профессордар, чинчийээччилэр араас бырайыактарга хото кытталлар. Соторутааҕыта АГИКИ Арассыыйа Сибиирдээҕи үрдүк үөрэх кыһаларын кытта Парижка көрсүһүүгэ кытынна. Устудьуоннары хардарыта атастаһан үөрэтиини, быыстапкалары тэрийэллэр. Онон бу дипломаттар институкка сылдьыылара сонун бырайыактары саҕалыырга төһүү буолуохтара.
Женни Стрюкова бэлэмнээтэ
Хаартыска интэриниэттэн туһанылынна