Арассыыйаҕа бөдөҥ “Инаглинскайдааҕы”шахтаны быйыл күһүҥҥэ диэри киллэриэхтэрэ
Нерюнгри оройуонугар оробуочай сырыытын кэмигэр, Айсен Николаев “Инаглинскайдааҕы” хайа-байытар комплекс тутулла турар эбийиэктэригэр сырытта.
Бу комплекс Саха сирин соҕуруу өттүгэр урутаан сайдар сиргэ-уокка киирэр уонна таас чоҕу хостооһуҥҥа, таҥастааһыҥҥа Уһук Илин сайдыытын тумус тутуллар суолталаах бырайыагынан буолар.
Комплекс сиригэр “Инаглинскайдааҕы” шахта бастакы уочаратын уонна “Инаглинскайдааҕы – 2” байытар фабриканы тутуу ыытыллар. Балар таас чоҕу хостооһуну уонна переработканы сылга 6 мөл туоннаҕа тиэрдэр кыаҕы биэриэхтэрэ.
“Колмар” таас чоҕу хостуур хампаанньа генеральнай дириэктэрэ Артем Левин иһитиннэрбитинэн, бүгүн производственнай эбийиэктэр бэлэмнэрэ 90 бырыһыаҥҥа тэҥнэһэр уонна эбийиэктэри быйыл күһүн үлэҕэ киллэриэхтэрэ. Коронавирустан сылтаан эбийиэги үлэҕэ киллэрии кыратык тардылынна.
2023 сылга 2-с уочараты тутуунан таас чоҕу хостооһуну уонна таҥастааһыны өссө 2 төгүл үрдэтэн, 12 мөл туоннаҕа тиэрдэр соруктаахтар.
Хайа-байытар комплекска бырайыагы олоххо киллэриинэн 4045 үлэ миэстэтэ тэриллиэҕэ. Билигин манна 1,7 тыһ. киһи үлэлиир. “Инаглинскайдааҕы” ГОК бырайыагар инвестиция уопсай кээмэйэ 72 млрд солкуобайтан тахса, итинтэн 20 млрд солкуобайа хайы-үйэ киирбит кэтэх инвестиция.
“Инаглинскайдааҕы” ГОК инвестиционнай бырайыагын судаарыстыба өйүүрүн суотугар федеральнай үбүнэн тимир суол инфраструктурата тутуллар уонна 2021 сылга үлэҕэ киириэхтээх. Маны сэргэ “Налдинская” подстанцияны тутуохтара.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Андрей Сорокин хаартыската
Бэлэмнээтэ Женни СТРЮКОВА.