Арассыыйаҕа грипп эпидемията 23 эрэгийиэҥҥэ бэлиэтэннэ. Саамай элбэхтик Саха сиригэр, Свердловскай, Еврейскэй уобаластарга, Бурятияҕа уонна Алтаайга ыалдьыбыттар.
Тохсунньу 30 күнүгэр бу боппуруоһу РФ бырабыыталыстыбатын мунньаҕар көрдүлэр. Доруобуйа харыстабылын миниистирэ Вероника Скворцова эпидемия кэмигэр дьону мунньар тэрээһиннэри ыытары тохтотор туһунан боппуруоһу көтөхтө. Кини илиини элбэхтик суунар, мааскалаах сылдьар туһунан санатта. Ыарыйдахха, бэйэҥ эмтэнэ сатаабакка, бырааска барары сүбэлиир.
Оттон Владимир Путин спордунан дьарыктанан, иммунитеты бөҕөргөтөр туһунан этэр.
Министиэристибэҕэ олунньу ыйы быһа ыарыы күөдьүйэ туруо диэн сэрэтэллэр. Скворцова этэринэн, билигин А грипп көрүҥнэрэ ордук тарҕаммыттар. Сибиинньэ грибигэр маарынныыр A (H1N1) уонна A (H3N2) вирус штаммалара “күүлэйдииллэр”. Бу ыарыы киһиэхэ көннөрү тумууттан атыннык, ыараханнык киирэр. Үрдүк температура хас да күнү быһа түспэт, киһи төбөтө дьалкыҥныыр, сэниэтэ суох буолар, сүһүөхтэрэ ыалдьаллар. Онон ыалдьа-ыалдьа үлэлиир, вируһу тарҕатар көҥүллэммэт.
Дьокуускайга ыарыы тарҕаныытын эпидемиологическай боруога куоһарыллан, оскуолаларга, оҕо саадтарыгар карантин биллэриллибитэ. Карантины уһатар дуу, уһаппат дуу туһунан боппуруоһу үөрэх управлениета сарсын, олунньу 1 күнүгэр көрүөхтээх.
Ангелина ВАСИЛЬЕВА, “Саха сирэ” хаһыат, edersaas.ru