Бу күннэргэ Саха сиригэр «Арассыыйа — омук киһитин хараҕынан» бырайыак үлэтин саҕалаата.
edersaas.ru
СӨ Тас сибээскэ уонна өрөспүүбүлүкэ норуоттарын дьыалаларыгар миниистирэ Гаврил Кириллин Пермскэйдээҕи медицинскэй университет устудьуона Камаль Зуани Арассыыйатааҕы таһымнаах «ByForeigners» бырайыакка кыттыытын өйөөн, дириҥ ис хоһоонноох үлэ бара турар. Бырайыакка уопсастыбанньык, Саха сиригэр олорор норуоттар култуураларын уонна үгэстэрин үөрэтэр, пропагандалыыр, АГИИК култуура салаатын аспирана Сардаана Сыромятникова үлэлэһэр.
Кини бу бырайыакка бэйэтин интернациональнай дьиэ кэргэнин олоҕун ис тутулун сырдатарын туһунан «инстаграмын» сирэйигэр бу курдук сырдатар:
— «Арассыыйа — омук киһитин хараҕынан» бырайыакка миигин үлэлэһэр кыахтаах диэн Василина Лукина мэктиэлээбитигэр махталбын тиэрдэбин.
Бырайыак чэрчитинэн 10 сиэрийэ уһуллуохтаах. Сүрүн сорук — омук устудьуоннара Арассыыйа куораттарыгар сылдьан, төрүт омуктар дьиэ кэргэттэригэр үс хонук устата олоро сылдьан, кинилэр күннээҕи олохторун-дьаһахтарын ис тутулун кытта билсиэхтээхтэр.
Саха сирин Мароккоттан сылдьар Камаль Зуани билиһиннэриэҕэ. Кини мин дьиэбэр олорон, саха уонна эбэҥки норуоттарын абыычайын уонна култууратын билсиэҕэ. Мин кэргэним Иван Сыромятников омугунан эбэҥки, мин — сахабын. Биэрии уһулларыгар эбэҥки норуотун култууратын пропагандиһа «Гиркилэҥ» үҥкүү ансаамбыла, Өймөкөөнтөн хомусчут Юстас Кривошапкин, Кэбээйи Сэбээн Күөлүттэн куолайынан ыллыыр Никифор Ефремов кыттыыны ыллылар.
Бырайыак таҥыллан, оҥоһуллан бүтэн, балаҕан ыйын 10 күнүгэр киэҥ араҥа дьүүлүгэр тахсыаҕа. Тэрийээччилэр Интэриниэт ситимнэринэн быһа холуйан 2 мөлүйүөн көрөөччүнү хабар былааннаахтар.
Оттон биһиги өрөспүүбүлүкэ олохтоохторун аатыттан уопсастыбанньык, СӨ Дьахталларын уопсастыбаннай тэрилтэлэрин сойууһун ыччат салаатын актыбыыһа Сардаана Сыромятниковаҕа Ийэ дойдуга бэриниилээх буолуу сылыгар төрөөбүт Сахатын сиригэр туризм сайдыытыгар улахан оруоллаах бырайыакка бэйэтин баҕа өттүнэн кытта сылдьарыгар истиҥ махталбытын тиэрдэбит. Саха сирин туһунан Арассыыйа эригийиэннэрин кытта холбуу тутан билиһиннэриэхтээх «бэйэбит уолбутугар» — Марокко ыччатыгар Камаль Зуанига дойдубут туһунан үгүһү билэн, элбэх көрөөччүнү тардарыгар баҕарабыт.
Елена ПОТОЦКАЯ, «Саха сирэ» хаһыат, edersаas.ru
Хаартыска — Сардаана Сыромятникова «инстаграмыттан».