Аракыата тобохторо түспүт улуустарыгар бэрэбиэркэ ыытыллар.
edersaas.ru
Нэһилиэнньэ олоҕор куттал суох буолуутун хааччыйар судаарыстыбаннай кэмитиэт бэрэссэдээтэлэ Дмитрий Лепчиков полярнай орбитаҕа космическай аппарааттары ыытыы түмүгүнэн, куйаар ситиминэн мунньах ыытта.
Ахсынньы 18 күнүгэр Москва бириэмэтинэн 15:26:26 чааска «Восточнай» космодромтан «Союз-2.1б» аракыата көппүтэ. Аракыата «Фрегат» төбө өттүнээҕи чааһа Алдан оройуонугар, иккис чааһа Кэбээйи улууһугар Сангаарга уонна Сэбээн Күөл нэһилиэгэр тиийэн түспүттэрэ.
Ахсынньы 19 күнүгэр анал хамыыһыйа аракыата тобохторо түспүт сирдэрин көрдө, үөрэттэ. СӨ экологияҕа, айылҕаны туһаныыга уонна ойуур хаһаайыстыбатыгар миниистири бастакы солбуйааччы Семен Яковлев Алдан оройуонугар хаар уонна күн-дьыл усулуобуйата көрдүүр үлэҕэ харгыстары үөскэппитин бэлиэтээтэ. Кэбээйигэ арыаката бөдөҥ тобоҕун булбуттар, онно бэрэбиэркэлиир үлэ бара турар.
Аракыата тобохторо түһэр «ЦЭНКИ»-НИИ СК АУо филиалын салайааччыта Андрей Воронин бэлиэтииринэн, дойду тиэхиньикэтэ бу да сырыыга эрэллээҕин дакаастаата. Аракыата көтүүтэ былааннаммытын курдук барда. Тобохторо ыйыллыбыт сирдэргэ чопчу түстүлэр. Булуллубут чаастар экологияҕа кутталы үөскэппэттэр. Кэбээйи оройуонун дьаһалтата уонна СӨ Быыһыыр сулууспата аракыата тобохторун эвакуациялыыр боппуруоһу көрөллөр.
Елена ПОТОЦКАЯ, «Саха сирэ» хаһыат, edersaas.ru
Хаартыска: СӨ Ил Дархан уонна Бырабыыталыстыба пресс-сулууспатын саайтыттан