Алтынньы 14 күнүгэр «Фрегат» диэн түргэтэтэр блоктаах «Союз-2.1б» аракыата OneWeb диэн космическай аппарааттары космоска таһаарар көтүүтэ буолбута. Саха сиригэр аракыата тобохторо түһүөхтээх сирдэригэр сөптөөх миэрэ ылыллыбыта. Саха сиринээҕи «Быыһыыр сулууспа» ГБУ быыһааччылара Алдан уонна Кэбээйи улуустарыгар куттал суох буолуутун толору хааччыйбыттара.
—Аракыата тобохторун хомуйуу тута саҕаламмыта. Кэбээйи улууһун хайаларыгар быыһыыр сулууспа исписэлиистэрэ лааҕыр тэринэн анал үлэни ыыталлар. «Аракыата тобохторо ыраах уонна хайалаах сиргэ түспүттэринэн, бөртөлүөккэ кэккэ ыарахаттары үөскэттэ. Сорох тобохтор хайа эниэтигэр, аппаларга сыталлар, — диэн быыһааччылар бөлөхтөрүн салайааччы Павел Алексеев иһитиннэрэр.
Сирэ-уота мөлтөх буолан, аракыата бааҕын эрбээн хас да өлүүгэ арааран, 1300 м курдугу аллараа түһэриэхтээхтэр, бу, биллэн турар, элбэх үлэни эрэйэр. «Биһигини элбэх үлэ күүтэр, лааҕыртан ыраах сытар тобохтору аҕалыахпытын наада. Бу үлэни хайаан да толоруохпут», — диир Павел Алексеев. Аракыата тобохторун «Восточнай» космодромҥа илдьиэхтэрэ.