Бырабыыталыстыба Бэрэссэдээтэлэ Евгений Чекин бэҕэһээҥҥи сүбэ мунньахха өрөспүүбүлүкэ сиригэр-уотугар түһэр аракыата тобохторугар сыһыаннаах боппуруоһу көрдө.
«Саха Өрөспүүбүлүкэтин сиригэр-уотугар “Восточнай” космодромтан көтөр аракыата тобоҕун үлтүркэйдэрэ түһэр түбэлэрин тэрийии уонна туһаныы туһунан иһитиннэриини «Роскосмос» судаарыстыбаннай корпорация космическай инфраструктураны туһаныыга толорооччу дириэктэрэ Андрей Мазурин оҥордо. Кини этэринэн, сэтинньи 28 күнүгэр «Восточнай» космодромтан «Метеор-М» аргыстаах иккис «Союз-2.1б» аракыата ыытыллыахтаах. Ахсынньы 22 күнүгэр Арассыыйаҕа оҥоһуллубут, ыксаллаах быһыыны-майгыны мониторинныыр «Канопус» аргыстаах «Союз-2.1а» аракыата көтүтүллэрэ былааннанар.
«Восточный» космодромтан көтөр «Союз-2» аракыаталар экологияҕа дьайыыларын туһунан айылҕа харыстабылын миниистирэ Сахамин Афанасьев билиһиннэрдэ. Былырыын муус устар 28 күнүгэр көппүт «Союз-2.1а» аракыата тобоҕо түһүөн иннинэ уонна түспүтүн кэннэ Алдаҥҥа, Бүлүүгэ оҥоһуллубут чинчийиилэр хаартан, ууттан уонна сиртэн ылыллыбыт боруобаларга туох да уларыйыы суоҕун көрдөрбүт.
Мунньахха Бырабыыталыстыба Баһылыгын бастакы солбуйааччы – тыа хаһаайыстыбатын уонна ас-үөл бэлиитикэтин миниистирэ Пётр Алексеев, Ил Түмэн сиргэ, айылҕа ресурсаларыгар уонна экологияҕа сыһыаннаһыыларга сис кэмитиэтин бэрэссэдээтэлэ Владимир Прокопьев, гражданскай уопсастыбалар институттарын сайдыытын миниистирэ Анатолий Бравин, нэһилинньэ олоҕор куттал суох буолуутун хааччыйыы судаарыстыбаннай кэмитиэтин бэрэссэдээтэлин э.т. Дмитрий Лепчиков, доруобуйа харыстабылын миниистирин солбуйааччы Людмила Вербицкая, Ил Дархан уонна Бырабыыталыстыба дьаһалтатын салайааччыны солбуйааччы Михаил Слепцов, Бүлүү улууһун баһылыга Сергей Винокуров, Кэбээйи улууһун баһылыга Игнатий Спиридонов, Кэбээйи улууһун Ламыҥха национальнай нэһилиэгин баһылыга Таисия Кейметинова кыттыыны ыллылар.
Раиса Сибирякова, “Саха сирэ” хаһыат, edersaas.ru
Александр Тарасов түһэриитэ, 2017 с. муус устар 29 күнэ