Бэҕэһээ А.Кулаковскай аатынан Норуоттар доҕордоһууларын дьиэтэ, СӨ норуоттарын култуурунай нэһилиэстибэлэрин киинэ итинник ааттаах дьоро киэһээни тэрийэн ыыттылар.
— Бастатан туран, алгысчыт Иван Васильев—Алгыстаах Уйбаан бөҕөргөтүү алгыһын түһэрдэ. Онтон киэһээ ырыа-тойук оройуттан тутулунна. Ону сэргэ, билгэлиир, алгыыр ураты дьоҕурдаах дьоммут сэҥээрээччилэрин, сэргээччилэрин кытары көрүстүлэр, атах тэпсэн олорон ирэ-хоро сэһэргэстилэр. Таҥха таҥхаланна, билгэ билгэлэннэ.
Дьону-сэргэни түмпүт «Арай биирдэ-ээ..» долгутуулаах дьоро киэһээни Саарын, Степан Васильев уонна Уус Алдантан, Намтан, Дьокуускайтан самодеятельнай кэлэктииптэр ыллаан-туойан, үҥкүүлээн ситэрэн-хоторон биэрдилэр, киэргэттилэр, — диэн тэрээһин туһунан А.Е.Кулаковскай аатынан Норуоттар доҕордоһууларын пресс-сулууспатыттан Айталина Аргунова сырдатта.
Биһиги корр., «Саха сирэ» хаһыат, edersaas.ru
Айталина АРГУНОВА хаартыскаҕа түһэриитэ.