Алтынньы 17 күнүгэр Арассыыйаҕа аан бастаан Аҕа күнэ бэлиэтэнэр. Бу бырааһынньык уопсастыбаҕа аҕа оруолун үрдэтэр, дьиэ кэргэн сыаннастарын тарҕатар туһугар тэриллэр. Оттон атын дойдуларга хайдах эбитий?
Швецияҕа 10 эдэр аҕаттан 8-һа оҕо көрөр дэкириэтинэй уоппускаҕа барар. Маннык эр дьон оҕолорун илдьэ пааркаҕа, кафеҕа мусталларын сөбүлүүллэр, кинилэри “латте-аҕа” диэн ааттыыллар. Эдэр аҕалары түмэр, көмөлөһөр саайтар, анал кафелар бааллар. Судаарыстыба аҕалар дэкириэккэ баралларын көҕүлүүр: аҕа оҕо төрөөбүтүн кэннэ 3 ый устата уоппускаҕа барар бырааптаах. Шведкалар эр дьону кытары тэҥ бырааптаахпыт диэн, оҕолоноот да, үлэлэригэр тахсаллар.
Италияҕа пааралар 30 саастарын лаппа ааһан, дьиэлэнэн-уоттанан, үлэлэригэр ситиһиилэнэн баран, оҕолоноллор. Онон оҕолорун көмүс курдук көрөллөр. Аҕа оҕо төрөөбүтүн кэннэ биир нэдиэлэлээх уоппусканы ылар, биир сылы быһа кылгас үлэ күннэнэр, командировкаҕа барара тохтуур. Онон аҕалар дьиэ кэргэннэрин кытары элбэх бириэмэлэрин атааралларын судаарыстыба көҕүлүүр.
Израильга дьахтар төрүүр кэмигэр аҕа хайаан да баар буолуохтаах, бастакынан оҕону илиитигэр түһэрэн ылыахтаах. Онон аҕалар олус эппиэтинэстээхтик сыһыаннаһаллар, дэкириэккэ оҕо көрөн олороллорун ким да сүөргүлээбэт.
Саҥа Зеландия бэрэсидьиэнэ 37 саастаах Джасинда Арден бу сайын кыыс оҕоломмута уонна тута кэриэтэ үлэтигэр тахсыбыта. Оҕо көрөр уоппускаҕа аҕалара барбыта. Бэрэсидьиэн саҥа судаарыстыбаннай бырагыраама ылыммыта: оҕо үс сааһыгар диэри нэдиэлэ аайы 60 дуоллар төлөнөр, кыһыҥҥы кэмҥэ оҕо тоҥмотун диэн ититиигэ 700 дуоллары биэрэллэр. Дэкириэт уоппуската 18 нэдиэлэттэн 22-гэ диэри уһаабыта.
Ангелина Васильева, «Саха сирэ» хаһыат, edersaas.ru
Хаартыска: znanie.ru