Араадьыйа — хараҕа суох киһи доҕоро

Ааптар: 
Бөлөххө киир:

82 саастаах Бүлүү Чочутун төрүт олохтооҕо Варвара Чиряева глаукома ыарыыттан икки хараҕа көрбөт буолуоҕуттан ыла, Саха араадьыйатын доҕор оҥостон олорор. «Күммүн онон бүтэрэбин», — диэхтиир. Сөбүлүүр биэриилэрэ — тыа хаһаайыстыбатын туһунан уонна «Араадьыйа пуондатыттан биэрии».
Илгиирэ киэһэ кэпсээн кэпсиирин сөбүлүүбүн. «Кэпсээн суруйан биэрдэххитинэ, өссө кэпсиэҕим» диэччи, — диэн Индира Бугаеваны кэпсиир. «Ааспыт ыйга Местникованы, Решетникованы, Фекла Иванованы иһиттим. Оо, кинилэр куоластара сүрэҕим-быарым ортотунан киирбитэ. Саҥараллара тоҕо үчүгэйэй! Араадьыйа кэлин наһаа тубуста. Телевизорга эмиэ холбонор буолбуттар. Хаарыаны, харахтаах дьон көрөн эрдэхтэрэ…— диэн санаатын үллэстэр тыыл бэтэрээнэ.
Варвара Дмитриевна Саха араадьыйатын салататыттан биир наһаа улахан көрдөһүүлээх.
— «Араадьыйа пуондатыттан» биэриини киэһэ 10 ч. кэннэ биэрэллэр. Ол кэмҥэ улуустары арааран кэбиһэллэр. Мин эрэ буолуо дуо, тыа сирин дьоно үксэ саатанарбыт эрэ араадьыйа буоларын өйдөөн туран, ити баҕа санаабын ылынналлар ханнык, — диир кырдьаҕас киһи.
Сарсыарда 6 ч. киэһэ 9 ч. диэри Варвара Дмитриевна — «сулустаах чааһа».
— Сарсыарда 6 ч. иннинэ туран, суунан-тараанан баран, анаан олорон истэбин. Сонуннары көтүппэккэ истэбин. Араадьыйам кэлэр бириэмэтигэр ханна да хамсаабаппын. Быыска-арыкка үчүгэй баҕайы ырыалар кэлэллэр. «Былыргы ырыа кэлээрэй» диэн наһаа кэтэһэбин, — диэн санаатын үллэстэр Сыдыбыл ытык кырдьаҕаһа.
Варвара Дмитриевна тахсаары турдахпына биир айбыт ырыатын бэйэтэ көрдөһөн ыллаан, киһини уйадытта:

«Ыллыыр-туойар чыычааҕым, чырыбынай чыычааҕым,
Сарсыардааҥҥы саһарҕа тахсар кэрэ кэмиттэн
Күнүм тахсар сириттэн көтөн-ааһан иһэҥҥин,
Күндү көмүс көмүс ытыспар,
Өлбөт мэҥэ уутуна ууран ааһыый, чыычааҕыам!
Харахтарбын эмтэнэн, күнүм кэрэ сырдыгын
Көрөн ааһыах этим мин…
Ыллыыр, туойар чыычааҕыам,
Аһыммаккын дуо, миигин?

+1
0
+1
0
+1
0
+1
0
+1
0
+1
0
+1
0