Ытыктабыллаах биир идэлээхтэрбитин, өрөспүүбүлүкэтээҕи “Забота-Арчы” хаһыат иллээх кэлэктиибин айар үлэҕит үйэ чиэппэрэ — 25 сыллаах үбүлүөйүнэн итиитик-истиҥник эҕэрдэлиибит!
Будулҕаннаах 90-с сылларга, олох укулаата уларыйар, судаарыстыба сууллар, өй-санаа сатарыйар, дьиикэй ырыынак сокуоннарынан салаллан тыын харбаһар, киһи бырааба кэһиллэр, атаҕастанар кэмнэригэр, ордук улахан охсууга кыаммат араҥа: кырдьаҕастар, тулаайахтар, ыарыһахтар, биэнсийэлээхтэр, элбэх тыынньалаах-иитимньилээх ыаллар түбэспиттэрэ.
Уларытан тэриллибит судаарыстыба иннигэр дьиикэй ырыынак хабыр дьайыытыттан нэһилиэнньэ социальнай көмүскэллээх буолуутун олохтооһун бэлиитикэтэ тыын суолталаах соругунан турбута. Дьэ, ол кэмҥэ кыаммат араҥа, кырдьаҕастар, биэнсийэлээхтэр, инбэлииттэр интэриэстэрин көмүскүүр, араҥаччылыыр үлэни көҕүлүүр сыаллаах-соруктаах “Забота-Арчы” хаһыат тэриллэн, нэһилиэнньэ ытык араҥатын интэриэһин былаас иннигэр өрө тутан дьайымтыалаахтык үлэлээн-хамнаан кэллэ.
Күн бүгүн Саха Өрөспүүбүлүкэтигэр ытык дьоммутун: сэрии, үлэ бэтэрээннэрин, биэнсийэлээхтэри, инбэлииттэри, ийэ буолууну, элбэх оҕолонууну судаарыстыба таһымынан өйөөһүн туруктаах бэлиитикэтэ олоххо киллэриллэригэр хаһыат оруола, кэлэктиип айымньылаах кылаата баар диэн киэн тутта сыаналыыбыт. “Арчылар”, үйэ чиэппэрин устата араас түһүүлээх-тахсыылаах кэмнэри бар дьоҥҥутун, норуоккутун кытта бииргэ туруулаһан кэллигит!
Ытыктабыллаах биир идэлээхтэрбит, инникитин да айымньылаах үлэни, ситиһиилэри, ытык дьоҥҥутун, кыамматы-кырдьаҕаһы араҥаччылыы, арчылыы сылдьыҥ диэн алгыыбыт!
“Саха сирэ” хаһыат эрэдээксийэтин кэлэктиибэ