Арҕахтаахха тахсыбыт саахал бэҕэһээ толору туоратыллыбыт.
Бу туһунан Саха сирин Бырабыыталстыбатын Бэрэссэдээтэлин бастакы солбуйааччытыгар Алексей Колодезниковка бэҕэһээ, бэс ыйын 24 күнүгэр, РФ ЫБММ Саха сиринээҕи салаатын сүрүн управлениетын начаалынньыгын солбуйааччы, полковник Роман Платонов иһитиннэрбит. Үлэ киэһээ 17.30 түмүктэммитин эппит.
— Тохтубут уматыгы хомуйар үлэ түмүктэннэ. Билигин уматык ууга тохтубут сибикитэ суох. Ол эрээри, хахханы миэстэтигэр хааллардыбыт. Дизель тохтубут сиригэр анал препараттары тутуннубут.
Онон нэһилиэнньэ доруобуйатыгар куттал суоһаабат. Арҕахтаахтар (Орто Халыма) иһэр ууларын итинтэн 500 миэтэрэ үөһээ сытар сиртэн ылаллар.
Саахалы туоратыыга 23 исписэлиис үлэлээтэ, алта анал тиэхиньикэ туһанылынна. Бөртүөлүөтүнэн өрүскэ 55 килэмиэтир усталаах сиргэ уматык киртитиитин көрдөөн көттүлэр эрээри, оннук көстүбэтэх.