СӨ бырабыыталыстыбатын бэрэссэдээтэлин бастакы солбуйааччы Алексей Колодезников иһитиннэрбитинэн, Орто Халыма улууһун Арҕахтаах сэлиэнньэтигэр уматык тохтубутун туоратар үлэлэр салҕаналлар.
“Барыллаан суоттааһынынан 4 туонна кэриҥэ уматык тохтубут. Алдьаммыт иһиккэ (емкость), уопсайа, 102 туонна дизель уматыга баар эбит. Саппаас иһиттэргэ хачайдаммыт уматык чопчу төһөтүн оробуочай бөлөх кээмэйдээтэҕинэ биллиэҕэ. Уот ыстаансыйатыгар сылга 200-220 туонна уматык ирдэнэр. Уматык паарката (емкостной парк) түөрт резервуартан турар: икки 200 кубометрдаах уонна икки 25 кубометрдаах”, — диэн Алексей Колодезников кэпсээтэ.
Бэрэссэдээтэли бастакы солбуйааччы этэринэн, Орто Халыма улууһун ыксаллаах быһыыга-майгыга хамыыһыйатын быһаарыытынан, Арҕахтаах сэлиэнньэтигэр үрдүк бэлэм буолуу эрэсиимэ биллэриллибит. Ыксаллаах быһыыны-майгыны сэрэтэр уонна туоратар биир кэлим судаарыстыбаннай систиэмэ (РСЧС) Саха сиринээҕи звенота үрдүк бэлэмнээх буолуу эрэсииминэн дьаһанар.
Санатан эттэххэ, Арҕахтаах сэлиэнньэтигэр дизельнэй электростанция резервуарыттан уматык тохтубутун туоратар үлэ барар. “Сахаэнерго” АУо Орто Халыматааҕы филиалын биригээдэтэ уматык тохтубутун туоратыыга уталыппакка тахсыбыта. Уматыгы саппаас резервуарга хачайдаабыттара. Билигин хоромньу кээмэйэ суоттанар.
Миэстэтигэр, Дьокуускайтан көппүт 15 киһилээх бөлөх, ону тэҥэ, “Якутскэнерго” ПАУо генеральнай дириэктэрэ Алексей Стручков, “Сахаэнерго” АУо генеральнай дириэктэрэ Гаврил Алексеев, “Сахаэнерго” оробуочай бөлөҕө, ЫБММ Саха сиринээҕи салаатын үлэһиттэрэ, быыһыыр сулууспа уонна уматык тохтуутун туоратар анал тэрилтэ бэрэстэбиитэллэрэ үлэлииллэр.
Ньиэп бородууктатын иҥэринэр препараттар, анал сириэстибэлэр, ол иһигэр сири эмтииргэ аналлаах бактериялар, киртийбитин суох оҥорор боннар, ньиэп бородууктатын хомуйар иһиттэр (емкость), туттуллар үнүстүрүмүөннэр, мотопомпа уонна харыстанар көстүүмнэр кэмпилиэктэрэ тиэрдиллибиттэр.
“Быһылаан тахсыбыт сиригэр боновай күрүөлээһиннэр турбуттара уонна уу үрдэ сорбенынан кутуллубута. Дьокуускайга илдьэн анаалыс оҥорорго уу ылыллыбыта”, — диэн Колодезников эбэн этэр.
Тустаах түгэн ыксаллаах быһыыны-майгыны сэрэтэр уонна туоратар итиэннэ баһаартан куттал суох буолуутун хааччыйар бырабыыталыстыба хамыыһыйатын суһал хонтуруолугар сылдьар.
СӨ Ил Дарханын уонна Бырабыыталыстыбатын пресс-сулууспата.