“Арассыыйа утары арҕааҥҥы дойдулар киллэрбит араас хааччахтара, мин санаабар, сыалларын-соруктарын ситиэхтэрэ суоҕа”, – диэн бэлиэтээн эттэ бүгүн Егор Борисов пресс-конференциятын кэмигэр.
– Хааччахтар киириилэрэ, биллэн турар, биһиэхэ эмиэ биллиэҕэ. Ол эрээри кэлиҥҥи сүүрбэччэ сылга Арассыыйа аан дойду экэниэмикэтин сайдыытын кытары тэҥҥэ иһэрин эмиэ умнумуохха. Онон, мин санаабар, арҕааҥҥы дойдулар Арассыыйа утары киллэрбит үгүс хааччахтара сыалларын-соруктарын ситиэхтэрэ суоҕа. Тоҕо диэтэргин, Арассыыйа аан дойду экэниэмикэтин кытары тэҥҥэ хардыылаан иһэр буолан, бу дойдуларга бэйэлэригэр охсуон сөп, Арассыыйаны эрэ таарыйбаттар. Билигин үгүс дойду бу хааччахтар кинилэргэ бэйэлэригэр хайдах охсуоҕун толкуйдаан, суоттаан эрэллэр, – диэн бэлиэтиир кини.
Иккиһинэн, Егор Афанасьевич бу хааччахтар ордук улахан хампаанньаларга, Арассыыйа бырайыактарыгар тас дойдуттан инвестицияны көрдөөһүҥҥэ дьайыан сөбүн этэр.
– Бу хааччахтар киириилэрэ ордук улахан хампаанньаларбытыгар, тас дойдуттан инвестицияны киллэриигэ дьайыахтара. Ол эрээри бу кылгас кэминээҕи көстүү буолуон сөп дии саныыбын. Арассыыйа бу сыллар тухары бэйэтин саппааһын хаҥатта. Араас пуонда нөҥүө да буоллун, бүддьүөппүтүн тыырыы да буоллун. Хайа уонна дойдубут араас уустук быһыыны-майгыны ааһан кэлбит уопута да сыттаҕа. 90-с сыллары биһиги ааспыппыт, билигин да уустук балаһыанньаны аһардар кыахтаахпыт, – диэн бэлиэтиир сенатор Егор Борисов.
Саха сирин туһунан этэригэр Егор Борисов: “Саха сирэ Арассыыйа бары эрэгийиэннэрин курдук син-биир хааччахтар киирбиттэрин билиэҕэ. Ол эрээри ис ырыынакпытыгар, аһынан-үөлүнэн хааччыллыыбытыгар кыһалҕа тахсыа суоҕа. Арай Киин баан сүрүн ставкатын улаатыннарбытын түмүгэр сүрүн туһанар малбыт-салбыт сыаната үрдүөҕэ диэн куттал баар. Билигин РФ бырабыыталыстыбата сыана эмискэ үрдээбэтин туһунан үлэни ыытар. Бу туһунан РФ бэрэсидьиэнэ Владимир Путин эмиэ этэн турар”, – диэн бэлиэтиир.
Ону сэргэ Арассыыйа кэлиҥҥи сылларга тыа хаһаайыстыбатын бородууксуйатынан үчүгэйдик хааччыллан олорорун этэр. “Саахар, бурдук чааһын эттэххэ, биһиги бу бородууксуйаларынан толору хааччыллан олоробут. Биирдиилээн астарынан ыллахха, оҕуруот аһыгар оҕустарыахпытын сөп. Орто, дьоҕус тэриллиилэри өйөөтөхпүтүнэ бу да боппуруос уһуллуоҕа дии саныыбын”, – диэн иһитиннэрэр кини.
Аграфена КУЗЬМИНА