Сунтаарга сэттэ, Ленскэйгэ алта элбэх кыбартыыралаах дьиэлэргэ төһө кээмэйдээх ититии туттуллубутун учуоттуур уопсай тэрили туруоруу үлэтэ бүгүн, сэтинньи 13 күнүгэр, түмүктэннэ.
Эниэргийэни харыстыыр тэрээһин СӨ ОДьКХ уонна энергетика министиэристибэтин пилотнай бырагырааматын нөҥүө ыытылынна, ороскуоту судаарыстыба хааһыната уйунна.
Сунтаарга биир, Ленскэйгэ икки элбэх кыбартыыралаах дьиэҕэ халлаан туругуттан көрөн, сылааһы биэрэр автоматизированнай ититии тус пууна туруорулунна. Маннык автоматика дьиэ иһигэр төһө сылааһын хонтуруоллуурга уонна ититии ороскуотун 25-30% кэмчилииргэ кыах биэрэр.
Ону таһынан, бу күннэргэ ОДьКХ киинин үлэһиттэрэ Сунтаар, Ленскэй улууһун, куорат дьаһалтатын, салайар хампаанньалары, олохтоохтору кытта көрүстүлэр.
Онон ити этиллибит арҕаа улуус олохтоохторо төһө ититиини туттубуттарыттан көрөн төлүөхтэрэ. Дьиэни сылытыы иһин төлөбүртэн төһө харчы ордубутун ааҕыы сыл ахсын бастакы кыбаарталы хойутаппакка оҥоһуллар. Холобур, 2019 сылга хос ааҕыы (перерасчет) 2020 сыл бастакы кыбаарталыттан хойутуо суохтаах.
Ол туһунан СӨ «ОДьКХ сайдыытын уонна эниэргийэни көдьүүстээхтик туттуу киинин» Пресс-сулууспата иһитиннэрэр.
Ититии ороскуотун харыстааһын түмүгэр ордубут харчыны кэлэр ыйдааҕы хомунаалынай өҥөнү сабарга, ону таһынан, салайар хампаанньаны кытта сүбэлэһэн баран подъеһы өрөмүөннүүргэ туттуохха сөп.
«Саха сирэ» хаһыат, edersaas.ru