“Росздравнадзор” салайааччыта Евгений Иннокентьев социальнай ситимнэргэ быһа эпииргэ тахсан, аптекаҕа төһө эмп-томп баарын, сыана хайдах олохтонорун, о.д.а. кэпсээтэ.
Кини этэринэн, балаҕан ыйыгар аптекаларга кыһалҕа үөскүү сылдьыбыт. Ол курдук, быйыл дойду үрдүнэн маркировкалааһын саҥа систиэмэтэ киирбит. Күһүөрү бу систиэмэҕэ тиэхиньиичэскэй кэһиллии тахсан, саҥа эмтэри киллэрэн, маркировка туруорар уустуктардаах буолбут. Онон ыскылааттарга эмп баарын да иһин, кыайан маркировкаламмакка, бытаарыы тахсыбыт. Ол эрээри, бу кыһалҕа сыыйа быһаарыллар.
Үгүс аптекаларга “Арбидол”, “Гриппферон”, о.д.а. вируһу утары охсуһар эмтэр сыаналара үрдээбитэ уонна суох буолан хаалбыттара. Евгений Иннокентьев кыһалҕа бу эмтэргэ наадыйыы эмискэ үрдээбитинэн, хаһаанар сыалтан элбэҕи атыылаһалларыттан үөскээтэ диэн быһаарда.
Кинилэр күн аайы Дьокуускай куорат аптекаларыгар эмп-томп төһө баарын, сыанатын, о.д.а. хонтуруоллууллар эбит. Онно көстөрүнэн, билигин наадалаах эмтэр, харыстанар сириэстибэлэр барыта бааллар. Холобур, аптекаларга сүүһүнэн тыһыынча мааска саппааһа баар.
Ангелина Васильева, «Саха сирэ» хаһыат, edersaas.ru