Нам улууһугар Аппааныга «Чороон» култуура киинэ үлэҕэ киирдэ.
Бу аныгы үйэ ирдэбилигэр эппиэттиир бэртээхэй уораҕай Саха АССР 100 сылыгар уонна саха норуотун чаҕылхай уола, уһулуччулаах уопсастыбаннай, бэлитиичэскэй диэйэтэл Максим Аммосов төрөөбүтэ 125 сылыгар ситэн-хотон дьэндэйбитэ улуус олохтоохторун үөрүүлэрин икки бүк үрдэттэ.
—-Өрөспүүбүлүкэ үбүлүөйдээх сылыгар култуура аныгы дыбарыастара, дьиэлэрэ Саха сирин болҕомтотун тардар, дьону-сэргэни түмэр киининэн буолуохтаахтар. Онтон аныгы инфраструктура тэриллиитэ уопсастыба, өрөспүүбүлүкэ култуурунай-духуобунай олоҕор уларыйыыны киллэрэр«, — диэн этэр СӨ Ил Дархана Айсен Николаев.
2020 сыллаахтан тутуу үлэтэ саҕаламмыт икки мэндиэмэннээх киин уопсай иэнэ 1 400 кв.м. кэриҥэ. Бу киин аһылларын нэһилиэк олохтоохторо улаханнык долгуйа күүппүттэрэ. Ол туһунан биһиги хаста да төхтүрүйэн суруйан турабыт. Долгуйа күүтэллэрэ оруннаах. Тоҕо диэтэххэ, 1,5 тыһыынча нэһилиэнньэлээх сэлиэнньэҕэ бүгүҥҥү күҥҥэ диэри сынньанар-аралдьыйар кииннэрэ суоҕа.
СӨ Бырабыыталыстыбатын вице-премьерэ Сергей Местников улуустар кииннэригэр уонна нэһилиэктэргэ сыл ахсын култуура дьиэлэрэ тутуллалларын киэн туттан, үөрэн-көтөн туран тоһоҕолоон эттэ. Култуура эбийиэктэрин тутуу, саҥардыы үлэтин далааһыннаахтык тэрийии өрөспүүбүлүкэ норуоттарын ураты култуураларын, талааннары саҥа кэрдиискэ таһаарарга кыаҕы биэрэрин ыйда.
Саҥа дьиэ бастакы мэндиэмэнигэр 180 миэстэлээх саалалаах, хаһаайыстыбаннай сирдээх, таҥас уларыттар, гримнэнэр хостордоох. Иккис мэндиэмэҥҥэ духуобунай уонна национальнай култуура киинэ, ааҕар саалалаах бибилэтиэкэ, тыас-уус таҥар устуудьуйа, уо.д.а. бааллар.
Култуура киинэ федеральнай уонна өрөспүүбүлүкэ бүддьүөтүн үбүгэр «Култуура» национальнай бырайыак иитинэн тутулунна. Бэлиэтээн эттэххэ, САССР 100 сылын көрсө тутуллубут култуура бу киинэ өрөспүүбүлүкэҕэ иккис улахан эбийиэгинэн буолар. Ааспыт нэдиэлэҕэ Уус Алдан улууһугар Бороҕоҥҥо В.В.Никифоров-Күлүмнүүр аатынан «Тойон Мүрү» диэн аныгы култуура дыбарыаһын арыйыы үөрүүлээх сиэрэ-туома ыытыллыбыта.
Манна даҕатан бэлиэтээтэххэ, култуура хайысхатынан ааспыт сылга элбэх үлэ ыытылынна. Ол курдук, «Култуура» национальнай бырайыак иитинэн, оҕо ускуустубатын тоҕус оскуолата музыка үстүрүмүөннэринэн, наадалаах тэриллэринэн, үөрэх матырыйаалларынан хааччыллыбыта. 11 муниципальнай модельнай бибилэтиэкэ тэриллибитэ. Култуурунай сынньалаҥ икки тэрилтэтэ уонна оҕо ускуустубатын икки оскуолата өрөмүөннэммитэ, итинтэн да атын элбэх үлэ ыытыллыбыта.
+1
+1
+1
+1
+1
+1
+1