Коронавирустан сылтаан үгүс тэрилтэ уһун өрөбүлгэ бардар даҕаны, олоҕу-дьаһаҕы хааччыйар хаһаайыстыбалар үлэлэрин тохтоппоттор.
edersaas.ru
Хотоҥҥо турар сүөһү көрүллэр-истиллэр, ынах ыанар, үүт сыахтарга астанан-үөллэнэн, үрүҥ ас арааһа буолан, нэһилиэнньэ сандалытыгар тиэрдиллэр.
Ити курдук, өрөспүүбүлүкэ агропромышленнай комплексын тэрилтэлэрэ коронавируһунан сибээстээн сэрэхтээх буолуу дьаһалларын күүһүрдэн, хааччахтааһын саҥа миэрэлэрин киллэрэн тураннар, тустаах эбээһинэстэрин үтүө суобастаахтык толороллор.
Ол эрээри, төһө эмэ сэрэтиллэрин үрдүнэн, сорох дьоннор изоляцияланыы эрэсиимин тутуспаттар. Инньэ гынан, тыа хаһаайыстыбатын үлэһиттэрэ Бүтүн Арассыыйатааҕы аахсыйаҕа кыттаннар, социальнай ситимнэринэн #МыДляВасБезВыходных флешмобтары таһаараллар.
Манна бэйэни изоляцияланыы эрэсиимигэр олорор биир дойдулаахтарын сибиэһэй аһынан-үөлүнэн хааччыйарга күннэтэ сыралаһар пиэрмэ үлэһиттэрэ, көтөрү иитэр оператордар, астыыр-таҥастыыр салаа исписэлиистэрэ (үүт уонна эт ас технологтара, сыахтар маастардара, биэкэрдэр) итиэннэ батарар эйгэ үлэһиттэрэ көхтөөх кыттыыны ылаллар.
Чахчыта даҕаны, кинилэр биһиги туспутугар биир күн өрөөбөккө, үтүө суобастаахтык уонна таһаарыылаахтык үлэлиир-хамсыыр буоланнар, маҕаһыыннарга ас-үөл быстыбат эбээт!
Раиса Сибирякова, «Саха сирэ» хаһыат. edersaas.ru