Анжелика Андреева: “Төрүт Сокуоҥҥа уларытыылары киллэриигэ көхтөөхтүк кытынныбыт”
Бэс ыйын 25 күнүттэн РФ Төрүт Сокуонугар уларытыылары киллэрэргэ куоластааһын бара турар. Дьокуускай куорат 202-с түөлбэтинээҕи быбаардыыр учаастакка сарсыардаттан дьон кэлитэлиир.
Киирээти кытта, иһирдьэ эппиэтинэстээх үлэһит температураны бэрэбиэркэлиир, дезинфекциялыыр сириэстибэнэн ыстарар. Урукку курдук пааспары учаастак үлэһиттэрэ бэйэлэрэ арыйан көрбөттөр, куоластааччы бэйэтэ бэлэмниир, уруучука ылан илии баттыыр, салгыы киирэн куоластаан баран дьоҕус дьааһыкка угар. Туох даҕаны хантаак суох, мааска булгуччу ирдэнэр.
CӨ Дьахталларын уопсастыбаннай тэрилтэлэрин сойууһун бэрэссэдээтэлэ, РФ Дьахталларын сойууһун бюротун чилиэнэ Анжелика Андреева:
— Төрүт Сокуоҥҥа уларытыы сүрүнээн дьиэ кэргэҥҥэ, оҕо аймахха, кэммиэрчэскэйэ суох тэрилтэлэргэ, салайааччылар тас дойдуга счета суох буолуохтаахтар диэн, уо.д.а. киирэллэр. Уопсайа, сүүстэн тахса уларытыы баар.
Арассыыйатааҕы дьахталлар сойуустарын салайааччыта Екатерина Лахова оробуочай бөлөх чилиэнэ. Онон биһиги быһаччы үлэлэһэ сылдьар киһиттэн уларытыы, куоластааһын туһунан билэ олорбуппут. Уһук Илин уокурук таһымыгар (Уһук Илин уокурук дьахталларын бөлөҕө баар) хас биирдии уларытыыны ырытыспыппыт, санаа атастаһыыта тахсыбыта. Ким эрэ утарар, ким эрэ биһириир. Түмүккэ улахан аҥаардара Төрүт Сокуоҥҥа уларытыылары киллэрэри сөптөөҕүнэн аахпыттара. Биллэн турар, утарар дьон бааллара. Ол кинилэр бырааптара, ол эрээри, үгүстэр биһирээбиттэрэ. Инньэ гынан, биһиги хас биирдиибит Төрүт Сокуоҥҥа уларытыылары киллэриигэ, эбиигэ көхтөөхтүк кытынныбыт дии саныыбыт, — диэн санаатын үллэһиннэ.
Людмила ПОПОВА, “Саха сирэ” хаһыат, edersaas.ru