CӨ Дьахталларын уопсастыбаннай тэрилтэлэрин сойууһун бэрэссэдээтэлэ, РФ Дьахталларын сойууһун Бюротун чилиэнэ Анжелика АНДРЕЕВА Саха сирин олохтоохторун 1 Маай бырааһынньыгынан эҕэрдэлиир:
— Өрөспүүбүлүкэ олохтоохторун сааскы сырдык, сылаас тыыннаах бырааһынньыгынан итиитик-истиҥник эҕэрдэлиибин!
Ыам ыйын 1 күнэ — биһиэхэ барыбытыгар Ийэ айылҕа уһуктуутун, тыынар тыыннаах барыта сылааска, кэрэҕэ, үтүөҕэ тардыһыытын кытта сибээстээх. 1 Маай көлүөнэлэри ыкса ситимниир: ытык кырдьаҕастарга – саамай күөгэйэр кэмнэрин санатар, орто саастаах дьону – үлэ кэлэктииптэрин сомоҕолуурга, ыччаты – сонун сүүрээни тобулан сайыннарыыга көҕүлүүр бырааһынньык.
Ийэ дойдуга бэриниилээх буолуу сылыгар 1 Маай бырааһынньыга төрөөбүт дойдуга тапталы өссө күүскэ уһугуннарар бэлиэ күн. Саха сиригэр 300-тэн тахса дьахтар уопсастыбаннай тэрилтэтэ төрөөбүт куораттарын, улуустарын, бөһүөлэктэрин, нэһилиэктэрин, түөлбэлэрин, дьиэ кэргэттэрин уйгулаах олохторун туһугар бары кыахтарын ууран туран үлэлиир. Бу күннэргэ коронавирус дьаҥынан сибээстээн, дьиэҕэ олоруу эрэсиимин кэмигэр, уопсастыбанньык-дьахталлар социальнай ситимнэринэн үгүс үлэни ыытан дьоннорун-сэргэлэрин сомоҕолууллар, санааларын көтөҕөллөр, сырдыкка-кэрэҕэ көҕүлүүллэр.
Күндү биир дойдулаахтарым, Сахам сирин дьоно-сэргэтэ! Айыҥ-тутуҥ, үйэлээҕи оҥорорго дьулуһуҥ. Эһигини кытта өрүү ыраас халлааннаах чаҕылхай күннэр аргыстастыннар!
Елена ПОТОЦКАЯ бэлэмнээтэ.
«Cаха сирэ» хаһыат, edersaas.ru