Уопсастыба

Анжелика Андреева: «Ийэ күнүн күндүтүк ылынабыт»

Бүгүн Саха сиригэр сырдык бырааһынньык — Ийэ күнэ бэлиэтэнэр.

edersaas.ru

Бу үөрүүлээх күнүнэн СӨ Дьахталлар уопсастыбаннай тэрилтэлэрин сойууһун бэрэссэдээтэлэ, Араассыыйа дьахталларын сойууһун Бюротун чилиэнэ Анжелика Андреева Саха сирин дьахталларын эҕэрдэлиир:

Күндү киэҥ нэлэмэн Сахабыт сирин күн күбэй ийэлэрэ! 

Эһигини өрөспүүбүлүкэбитигэр 26-с сылын бэлиэтэнэр Ийэ күнүнэн истиҥник эҕэрдэлиибин!

Ийэ сүрэҕэр оҕото аан бастаан: «ийээ…» диэн ыҥырыыта, бастакы «биэс» сыананы ылан үөрэн чаҕылыҥнаабыт хараҕа, олоҕун аналын — тапталын сиэтэн дьиэтигэр киллэриитэ, бастакы сиэн оҕону бэлэхтээһинэ — бу барыта кини олоҕун хатыламмат түгэнэ.

Биһиги өрөспүүбүлүкэбитигэр ийэҕэ, оҕоҕо, дьиэ кэргэҥҥэ туһуламмыт үгүс социальнай өйөбүл оҥоһуллар. Ол да иһин саха дьоно Ийэ күнүн саҥа бырааһынньыктартан ордук күндүтүк ылынабыт.

Бүгүҥҥү күҥҥэ маныаха сүҥкэн оруоллаах СӨ Бэрэсидьиэнин иһинэн үлэлээбит Дьиэ кэргэн, дьахтар уонна демографическай бэлиитикэтин кэмитиэтин салайааччыларыгар Анастасия Божедоноваҕа, Александр Пахомовка, Алексей Сергучевка, Николай Дегтяревка барҕа махталбытын тиэрдэбит. 26 сыл устата дьиэ кэргэн уонна демографическай бэлиитикэ сүрүн хайысхаларыгар, оҕо уонна ийэ балаһыанньатын тупсарыыга, чөл олоҕу өрө тутууга бэрт үгүс нормативнай сокуон баазата ылылынна.

Бүгүҥҥү бырааһынньыктааҕы күн  дьиэ кэргэн бэлиитикэтин боппуруостарын быһаарыыга үгүс сыраларын биэрбит Саха сирин аныгы лиидэр дьахталларыгар, өрөспүүбүлүкэ уопсастыбаннай-бэлитиичэскэй олоҕор сүҥкэн кылааты киллэрбит уопсастыбаннай диэйэтэллэргэ: Альбина Поисееваҕа, Елена Алексееваҕа, Валентина Кириллинаҕа, Александра Тихоноваҕа, Раиса Антоноваҕа, Варвара Прокопьеваҕа, Светлана Николаеваҕа, Лена Ивановоҕа, Татьяна Мостаховаҕа, Людмила Вербицкаяҕа, Альбина Черепановаҕа истиҥ махтал тылларын этэбит.

 

Бэйэтин кэмигэр сүрүннээн кинилэр туруорсан,  1993 с.  Саха сиригэр Ийэ күнэ бэлиэтэнэр буолбута. 1993 с.  «Ийэҕэ Махтал» үрдүкү бэлиэтэ баар буолбута. Бүгүн бу суолталаах наҕарааданан дьоһуннаах дьону иитэн таһаарбыт Саха сирин улуустарыттан  79 ийэ бэлиэтэннэ.   2017 с. «СӨ Дьоруой Ийэтэ» бочуоттаах бэлиэ олохтоммута. Бу бэлиэнэн наҕараадаламмыт дьахтарга биир кэмнээх 1 000 000 (биир мөлүйүөн) солк. харчынан бириэмийэ оҥоһуллар. Маны таһынан, 7 оҕоттон элбэх оҕону төрөппүт уонна иитэр ийэлэргэ I, II, III степеннэрдээх «Ийэ килбиэнэ» анал бэлиэ олохтоммута.

 

Күндү Саха сирин дьахталлара, саҥа кырачаан оҕо сытын ылбыт эдэркээн ийэлэртэн саҕалаан, хос-хос сиэннэрин көрөн дьолломмут эбээлэр, ийэ буолар дьолу билбит дьахтар-аймах, эһиги сылаас дьиэтигэр уйгу-быйаҥ уйаланнын, кырачаан оҕо күлүүтүнэн дьиэҕит иһэ туоллун. Чугас дьоҥҥут тапталлара эһигини олоххутун угуттаан, өрүү күлэ-үөрэ, айа-тута сылдьыҥ!

Бары үтүөнү кытта,

 СӨ Дьахталлар уопсастыбаннай тэрилтэлэрин сойууһун бэрэссэдээтэлэ, Араассыыйа дьахталларын сойууһун Бюротун чилиэнэ

Анжелика АНДРЕЕВА.

Хаартыска — интэриниэттэн.

0
0

Добавить комментарий