Аныгыскы «Азия оҕолоро» успуорт оонньууларын ханна тэрийэн ыытар туһунан Москваҕа кэпсэттилэр.
«Азия оҕолоро» Норуоттар икки ардыларынааҕы успуорт кэмитиэтин бэрэсидьиэнэ Владимир Максимов үлэни-хамнаһы сырдатта, былааны, бырайыактары билиһиннэрдэ. Оттон РФ успуорка миниистирэ Олег Матыцин далааһыннаах күрэхтэһии эдэр спортсменнарга дьоһун тирэх буоларын бэлиэтээтэ. Салгыы бу спортивнай оонньуулары 2022 сылга ханна ыытыахха сөбүн дьүүллэстилэр. Олор истэригэр Арассыыйа эмиэ ааттанна диэн Sportyakutia.ru иһитиннэрэр.
Маны сэргэ, спорт эйгэтигэр сыһыаннаан, норуоттар икки ардыларынааҕы саммиты тэрийиигэ бииргэ үлэлээһини салгыырга дуогабардастылар. Сыал-сорук үлэни сайыннарыыга туһаайыллар. Бу иннинэ икки төгүллээн ыытыллыбыт саммит түһүлгэтигэр 20-тэн тахса дойдуттан дэлэгээттэр түмсүбүттэрэ. Аан бастакы саммит 2017 сыллаахха алтынньыга, ыччаттар уонна устудьуоннар Аан дойдутааҕы бэстибээллэрин иитинэн ыытыллыбыта. Иккиһин 2018 сыл балаҕан ыйыгар, Соҕуруу Сахалиҥҥа «Азия оҕолоро» бастакы кыһыҥҥы оонньуулар буолаары турдахтарына тэриллибитэ. Онно мустар кыттыылаахтар, ыалдьыттар маассабай уонна оҕо-ыччат спордун сайыннарыыга болҕомтолорун уураллар, санааларын үллэстэллэр, бырайыактары дьүүллэһэллэр.
edersaas.ru