СӨ Национальнай бибилэтиэкэтигэр “Көҥүл бибилэтиэкэ” аһылынна. Аныгы үйэ ааҕааччыта кимий? Кини туохха тардыһарый? Үлэлиэн, ааҕыан-билиэн баҕарар сирэ хайдаҕый? Дьэ, ити ыйытыынан сиэттэрэн, быйыл саас СӨ Национальнай бибилэтиэкэтигэр “Көҥүл бибилэтиэкэ” аһылынна.
edersaas.ru
Икки этээс тухары ааҕааччыга анаан туох барыта баар буолла: сымнаҕас пуфиктар, көмпүүтэрдээх остуоллар, босхо интэриниэт уонна, биллэн турар, кинигэлэр. Маны таһынан муусуканы сөбүлээччилэр пластинка истиэхтэрин, минньигэс кофе иһэ-иһэ үлэлиэхтэрин, ааҕыахтарын сөп.
Ааҕааччылар эрэ буолбакка, тэрилтэнэн кэлэн, “Актив-киин” диэн хоско мустан үлэлииллэр, мунньахтыыллар, сынньанан ааһаллар. Билигин хас биирдии кэриэтэ тэрилтэҕэ “Тимбилдинг” үөдүйдэ. Ол эбэтэр үлэ хамаандата күүстээх, биир сомоҕо буоларыгар маннык үлэни ыыталлар. Дьокуускайга бу курдук мустарга эмиэ харчы төлүөххэ наада, оттон бибилэтиэкэҕэ эрдэттэн суруйтаран, буор-босхо “тимбилдинниэххэ” сөп.
Хас биирдии киһи сайдарыгар, эбии билиини ыларыгар, дьону кытары алтыһарыгар бу курдук сирдэр наадалар, ол эбэтэр “Бибилэтиэкэ – үһүс дьиэ” диэн ис хоһооннонор. Тоҕо диэтэххэ, киһиэхэ иккис уонна маҥнайгы дьиэтэ – үлэтэ уонна олорор дьиэтэ.
Бибилэтиэкэ сүрүн сыала-соруга – ааҕааччыга чугас уонна наадалаах буолуу.
СӨ Национальнай бибилэтиэкэтин сайыннарыыга дириэктэри солбуйааччы Светлана Попова:
“Аныгы бибилэтиэкэ хайдах буолуохтааҕый? Бу туһунан биһиги социологическай чинчийии ыыппыппыт. Маныаха эдэр дьон бэлиэтээбитинэн, бибилэтиэкэҕэ үчүгэй кинигэлэр баар буолуохтаахтар, үлэлииргэ табыгастаах усулуобуйа тэриллиэхтээх. Үлэлииргэ ким да мэһэйдиэ суохтаах, бибилэтиэкэрдэр эдэр дьоҥҥо үтүө сыһыаннаах, кинилэр интэриэстэрин, туохха наадыйалларын өйдүүр буолуохтаахтар. Ону таһынан интэриэһинэй дьону кытта көрсүһүүлэр, оонньуулар, араас аахсыйалар, флешмобар, биктэриинэлэр, тыйаатыр туруоруулара курдук тэрээһиннэри сэргииллэр эбит. Чуумпуга олорон үлэлиир миэстэ, сымнаҕас миэбэл, кафе, сынньалаҥ, оонньуу, кэпсэтии сирэ баар буолуон баҕараллар.
Биэнсийэлээхтэр бэлиэтииллэринэн, инбэлииттэргэ туспа сыһыан наада. Ол курдук, көмпүүтэргэ иһитиннэриини көрдүүрү чэпчэтэр, бибилэтиэкэҕэ баар кинигэни барытын электроннай барыйаанын оҥоруу ирдэнэр.
Уопсайынан эттэххэ, саҥа тииптээх бибилэтиэкэ көҥүл кэпсэтэргэ-ипсэтэргэ, бэйэни сайыннарарга, дьоннуун алтыһарга, үөрэнэргэ табыгастаах буолуохтаах. Маны барытын учуоттаан туран, СӨ Национальнай бибилэтиэкэтин уларытарга сананыыбыт – бу бүгүҥҥү күн ирдэбилэ. Маны таһынан ааҕааччыларбыт интэриэстэрин таба таайан, саҥа тэрээһиннэри эмиэ киллэрэбит”, -– диэн бибилэтиэкэ сүрүн үлэтин туһунан билиһиннэрдэ.
Ити курдук, Национальнай бибилэтиэкэ сүрүн дьиэтин иккис этээһигэр “Сиэрбис киин” олохтонно. Манна бибилэтиэкэ өҥөлөрүнэн, ону таһынан судаарыстыбаннай өҥөлөр (Госуслуга) порталларыгар босхо көмө оҥоһуллар. Аныгылыы кофейняҕа олорон, кинигэ ааҕыахха сөп.
Үһүс этээскэ “Актив-киин” оҥоһулунна. Манна сынньалаҥ уонна ааҕыы, интэриэстэринэн көрсүһүү сирэ баар буолла. Саамай элбэх докумуон, кинигэ манна баар. Кинигэлэр уйулҕа, үп-харчы, уус-уран айымньыларынан, муода, кулинария, интерьер, муусука, тыйаатыр, киинэ онтон да атын хайысхаларынан наарданан тураллар. Кинигэни дьиэҕэ уларсыахха да, атыылаһыахха да сөп.
Саха сирин салалтата СӨ Национальнай бибилэтиэкэтэ оҥорор өҥөлөрүн үрдүктүк сыаналаабыта. Манна кинигэни эрдэттэн сакаастыахха, бэчээт таһаарыыларын көмпүүтэргэ киллэриэххэ, ону таһынан 64 тыһыынчаттан тахса экземпляры онлайн көрүҥүнэн ааҕыахха сөп. Ону таһынан аан дойду кинигэлэрин көҥүл ааҕыахха сөп, маныаха бибилэтиэкэ сайтыгар сайаапка хаалларыахха эрэ наада. Аҕа саастаах уонна доруобуйаларынан хааччахтаах дьоҥҥо библиомобиль кинигэлэри дьиэлэригэр илдьэн-аҕалан биэрэр, маныаха тус бибилэтиэкэрдэр туһааннаах кинигэлэри булан биэрэллэр. Бу курдук өҥө бүтүн дойду үрдүнэн аҕыйах диэн ааҕааччылар махтаналлар.
Ити курдук, СӨ Национальнай бибилэтиэкэтэ дьон ааҕарыгар сыратын ууран туран үлэлиир, кэлиҥҥи сылларга дьон-сэргэ ааҕара элбээтэ диэн үлэһиттэр бэлиэтииллэр. Саха сирэ “Дойду үрдүнэн саамай ааҕар эрэгийиэн” үрдүк аатын ылыан ыллаҕа.
«Саха сирэ», edersaas.ru саайтка анаан Сайыына КЛАРОВА