Киин куоракка аныгы бибилэтиэкэ хайдах буолуохтааҕын, сайдар кэнсиэпсийэтин ырыттылар

Бөлөххө киир:

Саха Өрөспүүбүлүкэтин бырабыыталыстыбатын бэрэссэдээтэлэ Владимир Солодов сорудаҕынан Национальнай бибилэтиэкэ Саха сирин бибилэтиэкэлэрин сайыннарыы кэнсиэпсийэтин оҥорорго үлэлэһэр.

Өрөспүүбүлүкэ бибилэтиэкэлэрин тиһилигэ балачча сайдан турар. Саха сирин үрдүнэн 504 бибилэтиэкэ үлэлиир. Бибилэтиэкэ дьыалатыгар билигин уустук кэм үүннэ. Онон сөпкө, хайдах баарынан маны сыаналаан, салгыы сайдар туһунан толкуйдуохтаахпыт. Саха сирин хас биирдии олохтооҕо өй-санаа өттүнэн сайдарыгар бибилэтиэкэ туох оруоллааҕын быһаарыахтаахпыт”, — диэн ыам ыйын 26 күнүгэр бибилэтиэкэҕэ буолбут мунньахха Владимир Солодов этэн турардаах.

Бырабыыталыстыба бэрэссэдээтэлэ СӨ Национальнай бибилэтиэкэтэ оҥорор өҥөлөрүн үрдүктүк сыаналаабыта. Ол курдук манна кинигэни эрдэттэн сакаастыахха, бэчээт таһаарыыларын көмпүүтэргэ киллэриэххэ, ону таһынан 15 тыһыынчаттан тахса экземпляры онлайн ааҕыахха сөп. Ону таһынан Национальнай бибилэтиэкэҕэ аан дойду ханнык баҕарар тылынан суруллубут кинигэтин көҥүл ааҕыахха сөп, маныаха порталга сайаапка хаалларар эрэ наада. Бу курдук өҥө бүтүн дойду үрдүнэн аҕыйах.

Аныгы үйэ сиэринэн бибилэтиэкэлэр иннин диэки баран иһиэхтээхтэр. Бибилэтиэкэ дьиэтин иһин бүтүннүү уларытартан куттанар сатаммат. Ол курдук айар-тутар дьоҥҥо аналлаах туспа миэстэлэр тэрилиннэхтэринэ, оҕолор да, улахан да дьон, кинигэ ааҕартан ураты, сөбүлүүр дьарыктарынан дьарыктаныахтарын сөп буолуо этэ”, — диэн Солодов санаатын үллэстибитэ.

Бибилэтиэкэ үлэһиттэрэ өрөспүүбүлүкэ салалтатын сорудаҕын ылаат, дьон санаатын истэргэ уонна кэнсиэпсийэни оҥорорго үлэлэһэллэр.

Ол курдук бэс ыйыттан от ыйын бүтүүтүгэр диэри бибилэтиэкэрдэр улахан социологическай чинчийии ыыттылар. 22 тыһыынча кэриҥэ киһи санаатын иһиттилэр. Маны таһынан экспертэртэн кэккэ интервьюну ыллылар. Экспертэр, биллэр-көстөр дьон “Аныгы бибилэтиэкэ хайдах буолуохтааҕый?” диэн ыйытыыга санааларын үллэстибиттэрэ, хайдах салгыы сайдыахтааҕын туһунан бэйэлэрин көрүүлэрин кэпсээбиттэрэ.

От ыйын 23 күнүгэр Национальнай бибилэтиэкэ Историяҕа саалатыгар спикердэр 2024 сылга диэри Саха сиригэр бибилэтиэкэ үлэтин сайыннарыы кэнсиэпсийэтигэр тирэх буолуохтаах ньымалары кэпсэттилэр. Мунньахха уопсастыбаннаһы кыттыһыннардылар. Модераторынан СӨ култуура уонна духуобунай сайдыы миниистирин бастакы солбуйааччыта Владислав Левочкин буолла.

Мунньахха СӨ Национальнай бибилэтиэкэтин дириэктэрин бастакы солбуйааччы Василий Борисов, докумуон пуондатын салайыы киинин сэбиэдиссэйэ Светлана Бойтунова, бибилэтиэкэ дьыалатын салайыы киинин сэбиэдиссэйэ Галина Леверьева, Саха сирин худуоһунньуктарын Сойууһун бэрэссэдээтэлин солбуйааччы, скульптор Николай Чоччасов, “Полярная звезда” сурунаал сүрүн редактора Владислав Доллонов, “Журфикс” сурунаал сүрүн редактора, уопсастыбаннай диэйэтэл Яна Угарова, “Синет” хампаанньалар бөлөхтөрүн Afisha.ykt редактора Василий Кириллин, Дьокуускай үөрэхтээһин управлениетын үөрэхтээһини сайыннарыы салаатын сүрүннүүр исписэлииһэ Лариса Иванова, филология билимин дуоктара, ХИБҮ доцена Юлия Хазанкевич, суолга куттал суох буолуу салаатын үрдүкү инспектора Владимир Ощепков, Арктикатааҕы култуура уонна ускуустуба судаарыстыбаннай үнүстүүтүн доцена Василиса Тарасова, суруйааччы, блогер Дмитрий Михайлов, уопсастыбаннай диэйэтэл Вероника Попова, Дьокуускай куорат кииннэммит бибилэтиэкэ тиһилигин дириэктэрэ Мария Андреева, “Мои документы” электроннай өҥө хаачыстыбатын салаатын начаалынньыга Ольга Мильвид кытыннылар.

Мунньах түмүгэр биилэтиэкэлэр үгэс буолбут үлэлэрин сүтэриэ суохтаахтар, ол эрээри сыыппара үйэтигэр олорорбут быһыытынан, салгыы сайдыах тустаахтар диэн санааҕа кэллилэр.

Этиллибит тезистэргэ уонна нэһилиэнньэ ыйытыгар олоҕуран, 2024 сылга диэри өрөспүүбүлүкэҕэ бибилэтиэкэ дьыалатын сайыннарыы биир кэлим кэнсиэпсийэтэ оҥоһуллуо.

СӨ Национальнай бибилэтиэкэтин пресс-сулууспата

+1
0
+1
0
+1
0
+1
0
+1
0
+1
0
+1
0