Арааһа, 2012 сыллаахха этэ, Дьокуускайга аан бастаан ыытыллыбыт Норуоттар икки ардыларынааҕы I “Үрүҥ хаар алгыһа” поэзия бэстибээлин үөрүүлээхтик аһыыга кырачаан оҕолор – Дьокуускай куорат “Кыһыл көмүс балыкчаан” оҕо саадын иитиллээччилэрэ кэлэн хоһоон ааҕан чуопчаарбыттара. Кинилэр ортолоругар Аня Ксенофонтова диэн кыысчаан эмиэ баара — Лермонтов “Парус” хоһоонун бэркэ аахпыта.
Арай, эһиилигэр II бэстибээл буолбутугар – Анябыт эмиэ баар! Бу сырыыга, арыый улааппыт киһи быһыытынан, оттомноохтук, олус дьоһуннаахтык туттан, саха норуодунай бэйиэтэ Семен Данилов “Я от снега не бегу, я родился на снегу…”,— бу бэстибээл гимнэ буолбут хоһоонун, чаҕылхайдык аахта. Кэпсэтэн билсибиппит, Анябыт аны биһиги биир идэлээхпит, саха суруналыыстыкатын аксакала Иван Иванович Ксенофонтовпыт тапталлаах сиэнэ эбит!
Ити курдук, Аня Ксенофонтованы, хаһан эрэ оҕо саадыгар сылдьан өрөспүүбүлүкэҕэ Тыл күнүгэр тыйаатырга хоһоон аахпытыгар өйдөөн көрөн, поэзия бэстибээлигэр кытыннарбыт РФ уонна СӨ култууратын үтүөлээх үлэһитэ, “Үрүҥ хаар алгыһа” бырайыак координатора Ольга Харайбатова, аны хас бэстибээл аайы ыҥыран, кытыннарар. Онон, быйыл Аняҕа бу хайыы-үйэҕэ 5-с бэстибээлэ буолар. Тэрийээччилэр билигин кыысчааны таптаан, дьээбэлэнэн, “Үрүҥ хаар алгыһа” бэстибээлбит эдэркээн “бэтэрээнэ” – бу сыллар тухары биир да тэрээһини көтүппэккэ, барытыгар көхтөөхтүк кыттан иһэр, дииллэр үөрэ-көтө.
Бүгүн Аня Дьокуускай куорат 33N-дээх оскуолатын 5 “б” кылааһыгар ситиһиилээхтик үөрэнэр. Аняны хоһооҥҥо ийэтэ Алла Ивановна бэйэтэ дьарыктыыр. Бу бэстибээлгэ Аня Ксенофонтова саха норуодунай бэйиэтэ Наталья Харлампьева “Азия Хотун” диэн улахан кээмэйдээх айымньытын олус үчүгэйдик ааҕан, Национальнай бибилэтиэкэ историческай саалатыгар тобус-толору мустубут дьон истиҥ махталын ылыан ылла.
Татьяна МАРКОВА, «Саха сирэ» хаһыат, edersaas.ru
Ааптар хаартыскаҕа түһэриилэригэр: СӨ Национальнай бибилэтиэкэтин үлэһиттэрэ бэстибээлгэ анаан бэртээхэй быыстапканы тэрийбиттэр; Аня Ксенофонтова хоһоон ааҕар.