«Саха сирин киэн туттуута норуот бириэмийэтигэр аны «Наука диэйэтэлэ» диэн ахсыс номинацияҕа куоластааһын кыайыылааҕын талыыга кыттааччылары сүүмэрдээһин саҕаланна.
edersaas.ru
Өрөспүүбүлүкэҕэ араас хайысхаҕа ситиһиилээхтик үлэлии сылдьар учуонай үгүс. Бырайыак ирдэбилинэн куоластааһыҥҥа кыттыы ирдэбилэ маннык:
- Кыттааччы Саха сиригэр олорор буолуохтаах;
- Научнай үлэни ыыта сылдьар учуонай;
- Наука эйгэтигэр үлэлэрдээх, ситиһиилэрдээх буолуохтаах;
- Сааһа – 18-тан үөһэ.
Кыттааччылар анал форманы толороллор уонна gordost-yakutii@mail.ru электроннай аадырыска бэс ыйын 6 күнүгэр диэри сайаапкаларын ыыталлар. Сайаапкаларка 500х760 кээмэйдээх туруору түспүт хаартыскаларын киллэрэллэр. Киирбит сайаапакалар СИА сайтын «Саха сирин киэн туттуута» бырайыак рубрикатыгар бэчээттэниэхтэрэ.
Куоластааһын болдьоҕо — бэс ыйын 11-15 күннэрэ. Бэс ыйын 18 күнүттэн куоластааһын түмүгүнэн кыайбыт биэс финалист бэйэ-бэйэлэрин кытта күөн көрсүөхтэрэ. Бу куоластааһыҥҥа кыайбыт номинант аата бэс ыйын 22 күнүгэр биллиэҕэ. Куоластааһын СИА сайтыгар, Вконтакте, Instagram уонна Facebook социальнай ситимнэргэ ыытыллаллар.
Бу иннинэ «Норуот маастара» номинацияҕа куоластааһын олус көхтөөхтүк уонна тыҥааһыннаахтык барбытын бэлиэтиир тоҕоостоох. Онно кыайыылааҕынан Бүлүүттэн норуот маастара Николай Степанов тахсыбыта.
«Бастыҥ» номинация иһин куонкурус үлэ түмүгүн таһаарар, талааннары көрдүүр куоластааһын буолбатах. Бу аттыбытыгар үлэлии сылдьар, таптыыр идэлэригэр таба тайаммыт, үлэттэн дьоллонор дьону кэмигэр бэлиэтээһин буолар. Кинилэргэ махтал тылларын саамай күөгэйэр күннэригэр сырыттахтарына этэн үөрдүү.
Күндү доҕоттор, бэйэҕит улуустаргытыттан төрүттээх, тахсыылаахтык үлэлии сылдьар ситиһиилээх учуонайдаргытын бар дьон билиитигэр инники күөҥҥэ таһааран, кинилэргэ өйөбүл буолуҥ. Кытаатыҥ, өссө да бириэмэ баар!
Елена ПОТОЦКАЯ, «Саха сирэ» хаһыат, edersaas.ru