Ил Дархан эбээһинэһин быстах кэмҥэ толорооччу Айсен Николаев шорт-трек сулуһун Виктор Аны Сеулга көтүөн иннинэ көрсүбүт уонна өрөспүүбүлүкэбитигэр хаҥкы спордун сайыннарар туһунан биллэрбит. Бу туһунан СИА-ҕа Григорий Фоменко суруйар.
— Виктор Ан курдук биллиилээх спортсменнар кэлэллэрэ, шорт-трек сайдыытыгар көмөлөөҕүн таһынан, уопсайынан спорт сайдыытыгар, эдэр ыччат чэгиэн, чөл олоххо тардыһыытыгар улахан көмөлөөх, — диир Айсен Николаев.
Көрсүһүүгэ өрөспүүбүлүкэҕэ хаҥкы спордун сайыннарарга бары миэрэлэр ылыллыахтара диэн бэлиэтиир диир СИА кэрэспэдьиэнэ. «Саха сиригэр сэттэ ый устатыгар тымныы, онон биһиэхэ, төһө кыалларынан элбэх сабыылаах стадионнар наадалар. Маныаха уһулуччу, чаҕылхай спортсмены уонна Арассыыйа Хаҥкыга спордун бэдэрээссийэтин кытары хардарыта сибээстээх үлэлиир сыһыан олохтонно, — диэн эбэн биэрбит.
Виктор Ан уонна РФ Хаҥкыга спордун бэдэрээссийэтин бэрэссэдээтэлэ Алексей Кравцов, манна кэлэ сылдьыбыт бырагыраамалара толорутун бэлиэтээбиттэр. Олимпиада алта төгүллээх чөмпүйүөнэ Дьокуускайга хаҥкыга сүүрүүнэн дьарыктанааччыларга иккитэ маастар-кылаас ыыппыт, куорат дьаһалтатын бэрэстэбиитэллэрин кытары көрсүбүт, ону сэргэ, бэҕэһээ «Сахамедиа» медиакиинигэр пресс-конференцияҕа кыттыбыт. СИА-ҕа биэрбит эксклюзивнай интервьютугар спорка маҥнайгы хардыыларын, Арассыыйаҕа олорон ордук тугу ахтарын кэпсээбит. Ону таһынан, спортсмен Саха сиригэр өссө да кэлэргэ бэлэмин эппит.
Анатолий Шестаков хаартыскаҕа түһэритэ.