«Ситиһии», «Дьол», «Таптал». Маннык сахалыы ааттаах кириэмнэр, сирэй мааскалара, гиалуроновай сирэй сүмэһиннэрэ бу күннэргэ атыыга таҕыстылар.
edersaas.ru
Бу сонун сүүрээни «Антуар» косметика фирматын салайааччыта Антонина Дормидонтова олоххо киллэрдэ.
Эдэр урбаанньыт 2015 сыллаахха төрөөбүт Сунтаарыгар кэриэй косметикатын атыылыыр бэйэтин «Антуар» маҕаһыыныгар үлэлии туран, дьүөгэтигэр этэн турардаах: «Сотору кэминэн бу корейскай косметиканы «Антуар» диэн сахалыы косметика солбуйуоҕа».
— Ол санаа ымыыта оҥостубут толкуйум өйбүттэн-санаабыттан арахсан биэрбэтэҕэ. Тиит уонна бэс туорааҕа саҥа үүнэн, сымнаҕас эрдэхтэринэ, кыра гына кырбаан, хатаран, оргутан баран, сирэйбэр соттон утуйарым. Сарсыҥҥытыгар сэбэрэм тупсан, тыынан турара. Ол онно мин «тоҕо биһиги бэйэбит эмтээх оппутунан-маспытынан ити кэриэйдэр, французтар курдук косметика оҥорбоппутуй» диэн саныырым күүһүрэн испитэ. Түөрт сылы быһа дууһабар иитиэхтээн илдьэ сылдьыбыт идиэйэбин былырыын олоххо киллэрбитим, — диэн эдэр урбаанньыт санаатын үллэстэр.
Иитиэхтии сылдьыбыт баҕа санаатын олоххо киллэрээри түөрт сыл устатыгар Антонина Дормидонтова Дьокуускайга оҕо маҕаһыынын арынан үлэлээбит. Ол эрээри, кыра оҕолоох киһи дьоҕус биисинэһинэн дьарыктаныыта уустуктардаах буолан, үлэтин тохтоппут. Онтон Сунтаарыгар тиийэн, «Антуар» маҕаһыынын аһан эмиэ косметика атыылыы сылдьыбыт. Ол эрээри улуустан киин куоракка тиэстэр, икки оҕолоох эдэркээн ийэҕэ эмиэ ыарахаттардааҕа. Онтон толкуйданан баран, өрөспүүбүлүкэтээҕи Биисинэс-оскуолаҕа үөрэнэ киирбит. Үөрэнэ сылдьан, саха косметикатын оҥорон таһаарыыга грант суруйан көмүскүүргэ санаммыт. Ол эрээри кэккэ төрүөтүнэн үбүнэн өйөбүлгэ тиксибэтэх. Ол да буоллар, Антонина санаатын түһэрбэтэх. Баҕа санаатын олоххо сыыйа киллэрэн испит. Биллэн турар, маннык бородууксуйа аналлаах сыахха оҥоһуллан тахсар буоллаҕа. Ол иһин билиҥҥитэ саҥа атаҕар туран эрэр урбаанньыкка бородууксуйатын бэйэтэ оҥорон таһаарарыгар үбэ-харчыта суох буолан, анал косметиканан дьарыктанар собуоту кытта дуогабардаһан саҕалаабыт.
— Косметика оҥорор араас тэрилтэлэри сыымайдаан, үөрэтэн баран, Пензатааҕы косметиканы оҥорон таһаарар собуоту талан, бииргэ үлэлэһэ сылдьабыт. Онно Максим Дудукин диэн урбаанньыты кытта кэпсэтэн, сакааспын оҥорторон, бу күннэргэ бастакы баартыйа бородууксуйаны туттубут. Саха косметикатын түөрт категорияҕа арааран (көннөрү тириигэ, куурар-хатар, сыалаах-арыылаах, сааһыран эрэр тииптээх тириигэ туттарга), араас бородууксуйаны оҥорон таһаарар былааннаахпын, — диэн кэпсиир эдэр урбаанньыт.
Былырыын саҕалаабыт идиэйэтин олоххо киллэрэн, бу күннэргэ Сунтаар Кутанатыттан төрүттээх Антонина Дормидонтова бэйэбит айылҕабытыгар үүнэр үүнээйилэртэн аан бастакы сахалыы косметиканы айан саҕалаата. Косметика сырьетын Пенза собуотугар ыытан, бэлэм бородууксуйаны аҕалар буолуоҕа. Маҥнайгы улахан баартыйата номнуо туһанааччылар сэҥээриилэрин ылла.
Эдэр урбаанньыт бу санаа ымыыта оҥосто сылдьыбыт ыра санаатын сахалыы тыыннаан атыыга таһаарбытын сэҥээрдим. «Косметикаҥ аата үчүгэйэ бэрт дии: «Дьол», «Махтал», «Кыайыы», «Түргэн», «Тускул» — киһи санаатын көтөҕөр», — диэн бэлиэтээбиппэр, Антонина санаатын маннык үллэһиннэ:
— Мин сирэй сүмэһининэн сарсыарда аайы «Дьолу» иҥэринэбин» диэн астына соттобун. Оттон «Таптал» кириэммин суумкабар укта сылдьабын. Бу маннык ааттаах бородууксуйам киһи сүргэтин көтөҕөр аналлаах буолуохтаах буоллаҕа. Кэнэҕэс анал тэрил атыылаһан, бу бородууксуйабын кэҥэтэн, атын эрэгийиэн косметическай собуотун илиитин-атаҕын манаабакка, 100% Саха сиригэр оҥоһуллубут косметиканы ырыынакка таһаарыахпын баҕарабын. Сайдан истэҕим аайы саха косметикатын Арассыыйа эрэгийиэннэригэр батарар былааннаахпын.
Эдэр урбаанньыт «InterCHARM» диэн норуоттар икки ардыларынааҕы аатырбыт парфюмернай-косметическай ырыынак сүрүн тэрээһинин анал быыстапкаларыгар анаан эккирэтиһэн туран сылдьар эбит. Манна Кэриэй, Кытай, Франция, Италия, Польша, Арассыыйа косметика оҥорон таһаарааччылара кэлэн кытталлар.
— Онно миэстэтигэр тиийэн элбэххэ үөрэнэҕин, уопут атастаһаҕын. Урукку сылларга наар көрө-истэ сылдьар эбит буоллахпына, былырыын кэмпириэнсийэҕэ кыттан, маастар-кылаастарга, араас сэминээрдэргэ сылдьан кэллим. Арассыыйа үрдүнэн натуральнай косметиканы оҥорон таһаарааччылар быыстарыгар соҕотох саха буолан сырыттым, — диэн кэпсиир.
Елена ПОТОЦКАЯ, «Саха сирэ» хаһыат, edersaas.ru